Арассыыйаҕа Норуоттар Сомоҕолоһууларын, Саха Өрөспүүбүлүкэтигэр Култуура, оттон Үөһээ Б... — 25 июня 2026 г. в 09:21:24.642
Арассыыйаҕа Норуоттар Сомоҕолоһууларын, Саха Өрөспүүбүлүкэтигэр Култуура, оттон Үөһээ Бүлүү улууһугар Үөрэҕирии ситимэ төрүттэммитэ 150 сылыгар анаммыт Үрүҥ Тунах ыһыахпыт сүрүн болҕомтотун оҕо-аймахха уурда. Ыһыах киэҥ түһүлгэтин биир чаҕылхай муннугунан оҕо түһүлгэтэ буолла. Манна кырачаан ыалдьыттарбыт үөрэн-көтөн, бэйэлэрин дьоҕурдарын көрдөрөн астыннылар. Н. И. Бойлохов аатынан оҕо искусствотын оскуолата, "Тускул" эбии үөрэхтээһин киинэ уонна Д. Е. Корякин аатынан оҕо спортивнай оскуолата ыһыах Үрүҥ Тунах күннэригэр оҕо-аймахха чахчы да умнуллубат түгэннэри бэлэхтээтилэр, тэрээһиннэр силиктэрин ситэрдилэр. Оҕо түһүлгэтин биир сүрүн тэрээһининэн кырачаан сулустарбыт толорбут дьоро кэнсиэртэрэ буолла. Оҕолор төрөөбүт дойдуларын, айылҕа кэрэтин, ийэ-аҕа тапталын туһунан ырыалары ыллаан, оонньуулаах үҥкүүлэри үҥкүүлээн, дьон-сэргэ сүрэҕин тапталын ыллылар. Оҕо саас ыраас кута, чуопчаарар саҥата ыһыах үөрүүтүн өссө үксэттэ. Маны сэргэ оҕолорго сахалыы култуураны, төрүт үгэстэри билиһиннэриигэ анаммыт фольклор тэрээһиннэрэ киэҥ далааһыны ыллылар. Оҕолор айымньылаах дьоҕурдарын сайыннарар сыаллаах уруһуй күрэҕэ ыытылынна. Кырачаан худуоһунньуктар Саха сирин айылҕатын, ыһыах үөрүүтүн, төрөөбүт алаастарын кэрэ көстүүлэрин бэйэлэрин харахтарынан көрөн, кумааҕыга түһэрдилэр. Кинилэр үлэлэриттэн оҕо саас ыраас уонна чаҕылхай олоҕо, кэрэҕэ тардыһыыта көстөрө. Күүстээх-уохтаах буоларга, доруобуйаны бөҕөргөтөргө анаммыт спортивнай күрэхтэргэ оҕолор олус кэрэхсээн кытыннылар. Манна оҕолор эйэлээхтик күрэхтэһэн, бэйэ-бэйэлэрин өйөһөн, күүстэрин холоһон, ыһыах үөрүүтүн өссө күүһүрдүлэр. Оҕо түһүлгэтэ быйылгы ыһыах биир саамай үөрүүлээх уонна олохтоох тэрээһининэн буолла. Манна оҕолорбут кэскили кэпсэттилэр, саргыны салайдылар, култуурабыт уонна үөрэҕириибит инники кэскилэ кинилэртэн тутулуктааҕын көрдөрдүлэр. Оҕо-аймах – биһиги кэлэр кэскилбит, онон кинилэр билии-көрүү эйгэтигэр уонна төрүт култуурабытыгар сыстыылара биһиги улууспут инники сайдыытыгар төһүү күүһүнэн буолар. Оҕолорбут үөрүүлэрэ-көтүүлэрэ, билиигэ тардыһыылара салҕана турдун! Галина Васильева