ТӨРСКН КЕЛӘН ЙИЛҺӘН СӘӘНӘР МЕДДГ БИЧКДҮД: «ЭЭҖИН КЕЛН — ЭРДНЬ» ГИДГ ТАҢҺЧИН МАРҺАНА АШ — 29 апреля 2026 г. в 12:01:25.753
ТӨРСКН КЕЛӘН ЙИЛҺӘН СӘӘНӘР МЕДДГ БИЧКДҮД: «ЭЭҖИН КЕЛН — ЭРДНЬ» ГИДГ ТАҢҺЧИН МАРҺАНА АШ 💎А. Ш. Кичиковин нертә Хальмг үндсни гимназин улд, 4-гч сарин (Мөрн сарин) 24-д "Ээҗин келн - эрднь" гидг таңһчин төгсгч марһан давулгдв. Хальмг АССР-ин Ачта номин үүлдәч, номт Б. Д. Муниевд нерәдгдсн эн марһанд 13 орлцачнр(5-8-гч кл. сурһульчнр) хальмг райодас болн Элст балһснас ирсмн. Мендин үгән Хальмг Таңһчин сурһулин болн номин министерствин әңгин һардач З. П. Убушиева келв. Ашлгч марһанд тәвцән Муниевин өрк-бүл орулсмн,- нертә номтын һал ач Муниев А. У. эврәннь авһиннь тускар тодрхаһар келәд, ирсн улст соньн зәңг медүлв. Марһана некврәр, орлцачнр иим даалһврмуд күцәсмн: 1)Бийиннь тускар эврә үгәрн келҗ өглһн; 2) Соңслһн (аудирование) - соңсҗ авсан эврә үгәрн келҗ чадлһн; 3) Орс келнәс хальмг келнд орчулх - зәңгс чикәр, аһулһинь медүләд тогталһн; 4) Жюрин гешүдлә күүндх - тәвсн сурврмудт хәрү өгч чадлһн... Сурһульчнр төрскн келәрн келәд, дассн медрлән үзүләд, күүндәд , ухан-тоолвран медүлв. Марһана ашнь иим болв: 🥇1-гч орм - Тюмидова Альмина, Элст балһсна Хальмг үндсни гимназин сурһульч (багшнь - Бадмаева Л. И.); 🥈2-гч орм - Манжеева Элистина, Көглтин Д .Н. нертә Элст балһсна 17-гч школын сурһульч (багшнь - Манджиева Н. Д.); 🥉3-гч орм - Бадма-Халгаева Янжина, Люлякина И. М. нер зүүсн Лаган балһсна 1-гч школын сурһульч (багшнь - Ованова Е. М.). Марһана цуг орлцачнр мөңгнә мөрәһәр ачлгдв, багшнртнь күндллһнә һашг бәрүлсмн. Җил болһн бүрдәҗ тогтсн эн Марһан, төрскн кел делгрүллһнд ончта тәвцән күргх гиҗ ицҗәнәвидн, тегәд "ээҗин келн - эрднь", энүнәс, "мана келн - нарт делкән зөөр", гиҗ болхмн. 📸Зургин цомг: https://vk.ru/album-219632532_310752239