ПщIэ зыхуэтщI, ди хэкуэгъухэ! — 22 июня 2026 г. в 08:51:13.177
ПщIэ зыхуэтщI, ди хэкуэгъухэ! Мэкъуауэгъуэм и 22-р — дэ тщыщ дэтхэнэ зымкIи махуэ хэхащ. А махуэм, илъэс 85-кIэ узэIэбэкIыжмэ, мамыру псэу совет цIыхухэм хъыбар хьэлъэ къаIэрыхьащ — Европэ псом Iуэху хьэлъэкIэ, лъыгъажэкIэ пхыкIа фашист Германиер, хэIущIыIу ямыщIу, ди къэралым къытеуащ. Радиоточкэ псоми къиIукIащ иужькIэ цIэрыIуэ хъуа, лъэпкъ псор зэкъуэзыгъэува жыIэгъуэр: «Ди Iуэхур пэжыгъэм тетщ. Бийр зэхэткъутэнущ. ТекIуэныгъэр дэдеинущ!» Асыхьэтым цIыху мелуанхэм я мамыр гъащIэм кIэ игъуэтащ, я хъуэпсапIэхэмрэ мурадхэмрэ зэтракъутащ. IэщэкIэ зэщIэузэда бийм Хэкур щахъумэну къэтэджащ зауэлIхэмрэ къулыкъу зыщIэхэмрэ къанэмыщIауэ, егъэджакIуэхэри, ухуакIуэхэри, колхозхэтхэри, музыкантхэри, дохутырхэри, инженерхэри… ЛIыжь-фызыжьхэр, бзылъхугъэхэмрэ сабийхэмрэ заводхэмрэ фабрикэхэмрэ щыIэ станокхэм бгъэдэуващ, техникэ хьэлъэм и рулым дэтIысхьащ, зауэлIхэмрэ къэралымрэ зыхуеину псомкIи къызэрагъэпэщын папщIэ. Псори фронтым папщIэ! Псори ТекIуэныгъэм папщIэ! Ди цIыхухэм къапэщылът зэхэуэ хьэлъэхэмрэ зэпэщIэтыныгъэхэмрэ я жэщ-махуэ 1418-рэ. Зауэ губгъуэхэм пщIэ яIэу бийм пэщIэтащ Къэрэшей-Черкесым и къуэхэри — цIыху мин 46-м щIигъу. Ди хэкуэгъу мин 15-м нэхърэ нэхъыбэм зэрахьа хахуагъэмрэ гуеигъэмрэ папщIэ нагъыщэхэр къыхуагъэфэщащ, абыхэм ящыщщ нагъыщэ нэхъ лъапIэ дыдэр — Совет Союзым и ЛIыхъужь, Урысейм и ЛIыхъужь щIыхьыцIэхэр. Нобэ, ТекIуэныгъэшхуэр къызэрытхьрэ илъэс 81-рэ текIыжами, ди Лъэпкъ Пашэ Путин Владимир Владимирович къызэрыхигъэщащи, ди лъэпкъхэр зэкъуегъэувэ гуфIэгъуэмрэ гуауэмрэ, пагагъэмрэ фIыщIэмрэ, гъащIэ мелуанхэм я уасэкIэ нацизмэр зэтезыкъута, хуитыныгъэмрэ мамырыгъэмрэ цIыхухэм къахуэзылъэща ди нэхъыжьхэм щхьэщэ яхуэщIыным! А фэеплъыр игъащIэкIи псэунущ, адэжьхэм я лIыгъэмрэ Хэкум и хъумакIуэхэм я иджырей щIэблэр — СВО-м хэтхэр, дзэ къалэным зэрыхуэпэжымрэ я фэеплъыр зэрыпсэум хуэдэу. Мы махуэ хэхам ди щхьэр яхудогъэщхъ зэхэуэхэм хэкIуэдахэм, концлагерхэм, гъэрыпIэхэм илIыхьахэм, яубыда щIыналъэхэм икIуэдахэм, блокадэр, мэжэщIалIагъэмрэ яхуэмыгъэкъаруун лэжьыгъэмрэ тылым зыхуэмыхьахэм псоми я фэеплъым. Псоми фэеплъ нэху! Зыри тщыгъупщакъым, зыми тщыгъупщакъым! ТЕМРЕЗОВ Рэшид, Къэрэшей-Черкес Республикэм и Iэтащхьэ ИВАНОВ Александр, Къэрэшей-Черкес республикэм и ЦIыхубэ ЗэIущIэм (Парламентым) и тхьэмадэ АРГУН Мурат, Къэрэшей-Черкес республикэм и тхьэмадэ