Ăслăлăх тĕнчи тĕпсĕр те чикĕсĕр — 24 июня 2026 г. в 04:00:04.603
Ăслăлăх тĕнчи тĕпсĕр те чикĕсĕр «Урал сасси» хаçатăн 24№ эпир вулакансене Пушкăртстанра Чăваш наци ăслăлăхпа ÿнер академин (ЧНĂӲА) Президиум ларăвĕ иртесси çинчен пĕлтернĕччĕ. Ăна июнь уйăхĕн 20-21-мĕшĕсенче Ĕпхÿ хулинче тата Кармаскалăпа Авăркас, Гафури районĕсенче йĕркелерĕç. Малтанхи кун Шупашкартан килнĕ ăсчахсене Павел Миронов ячĕллĕ чăваш вырсарни шкулĕнче кĕтсе илчĕç. Вунă çынран тăракан делегацие ЧНĂӲАн яваплă секретарĕ Елизавета Долгова ертсе пычĕ. Çакăн хыççăн хăнасем Пушкăртстанри Уралçум филиалĕн (ертÿçи – Игорь Петров) хастарĕсемпе пĕрле этнографи экспедицийĕ пуçланнă май, Кармаскалă районĕнчи Тинĕскÿл ялне çул тытрĕç. Вырăна çитсен вĕсем ялти культура çурчĕн ĕçĕ-хĕлĕпе паллашрĕç, Иван Тарасов академик-журналистăн вил тăпри çинче пулса митинг ирттерчĕç, ăна пуç тайрĕç. Вырăнти фольклор материалĕпе паллашас тата ăна пухас тĕллевпе ăсчахсен ушкăнĕ Тинĕскÿл хыççăн Йăмран ялне çитрĕ. Тĕлпулу культура çуртĕнче иртрĕ. Кунта академиксем «Кивĕ çуртăн вăрттăнлăхĕсем» спектакле пăхса хак пачĕç, «Çăлкуç» халăх ансамблĕн пултарулăхĕпе паллашрĕç. Ун хыççăн Шупашкар хăнисем Раиса Васильевапа Владимир Милютин ăсчахсем ăсталăх класĕсем ирттерчĕç. Ĕç кунне пĕтĕмлетсе тĕлпулу вĕçĕнче ăслăлăхпа культура ыйтăвĕсене сÿтсе яврĕç, малашлăх планĕсене палăртрĕç. Вырăнти «Çăлкуç» ушкăнăн çитĕнĕвĕсемпе унăн ертÿçи, ПР тава тивĕçлĕ культура ĕçченĕ Алина Степанова паллаштарчĕ. Канашлу усăллă та тухăçлă иртрĕ. Тĕплĕнрех пĕлме - https://vk.cc/cL0Wy8