Нөҥүө күнүгэр сарсыарда эрдэттэн Татаардар Сабантуйдара Майдан/Ильинка диэн өҥ сирдээх ... — 14 июня 2026 г. в 00:57:29.333
Нөҥүө күнүгэр сарсыарда эрдэттэн Татаардар Сабантуйдара Майдан/Ильинка диэн өҥ сирдээх аһаҕас киэҥ сиргэ атыы эргиэн дьаарбаҥката тэрилиннэ, Түһүлгэбитигэр маастардар быыстапкаларын ыйаат,маастар кылаастары ыыттылар, атыы – эргиэн дьаарбаҥкатын тэрийдилэр, уус уолаттарбыт оһохторун оттон болгуо таһаардылар. Ыһыахпыт алгыһынан саҕаланна, алгыһы толордо, айылҕаттан айдарыылаах Мэҥэ – Хаҥалас ыччата Денис Оконешников.Түһүлгэбитигэр күндү ыалдьыт буоллулар: Татарстан өрөспүүбүлүкэтин Аҕа баһылыга Рустам Нургалиевич Минниханов, Нижнекамск куорат аҕа баһылыга Радмир Беляев, Саха Өрөспүүбүлүкэтин бырабыыталыстыбатын бэрэссэдээтэлин солбуйааччыта Сергей Васильевич Местников, Дьокуускай куорат Аҕа баһылыга Евгений Николаевич Григорьев, Нижнекамск олохтоохторун үлэ, тыыл бэтэрээннэрэ, Казань куоракка араас институттарга үөрэнэр Саха сирин устудьуоннара, СВО бэтэрээннэрэ, уо.д.а. Ыһыах сиэрин – туомун ситэрэн баран бары Сабантуй киин түһүлгэтигэр тиийэммит, бары бииргэ парааттаатыбыт, үөрүүлээх аһыллыы бэрэстэбилиэнньэтигэр кытынныбыт, төһө да ардаатар бырааһынньык өрө көтөҕүллүүлээхтик ааста.Сабантууйдара Нижнекамск куората тэриллибитэ 60 – сылыгар ананна. Ыһыахпыт эҕэрдэ концерынан, Саха сириттэн сылдьар туйгуннук үөрэнэр устудьуоннары чиэстээтилэр, бырааһынньыкпыт оһуокайынан түмүктэннэ. Кэлиэхпититтэн барыахпытыгар дылы, бары саба түһэн ыһыах түһүлгэтин ыраастааһыныгар, киэргэтиитигэр, ол быыһыгар репетицияларга сылдьан, ким төһө кыахтааҕынан, быыставка туруоруутугар, алаадьы, быыппах астааһыныгар биир дьиэ кэргэн курдук көхтөөхтүк сырыттыбыт. Биир күн Нижнекамск устун понорамнай экскурсияҕа, сорохтор хомус музейыгар сырыттыбыт. Куорат олохтоохторугар анаан “Нижнекамские термы” диэн ааттаах аһаҕас халлааҥҥа сөтүөлүүр итии уулаах араас бассейнаах сөтүөлүүр сиргэ сылдьан бары кэриэтэ үлэ кэнниттэн дуоһуйа сөтүөлээтибит, сууннубут-тараанныбыт.Онно тиийдэххитинэ эбэһээт сылдьын, бэртээхэй сир баар эбит. Олохтоох дьон бары , сөҕөн-махтайан, сүргэлэрэ көтөҕүллэн үөрэн – көтөн тарҕастылар. Көрсүһүү түмүгүнэн икки баһылыктар икки омук култуурата, спорда сайдарын туһуттан икки өттүттэн сөбүлэҥ түһэрсэн баттастылар. Бу сылдьарбыт тухары НВК – быт бастыҥ үлэһитэ Альбина Тарабукина барыбытыттан кэриэтэ интерьвю ылан, олохтоох “Тэтим” араадьыйаҕа сырыыбыт туһунан сырдата сырытта. Төһө да ыарахан сыллар үүннэллэр модун Арассыыйабыт үрдүнэн биир сомоҕо буоламмыт, үрдүк култууралаахпытын көрдөрөн, эйэлээх олоххо дьулуурбут күүһэ түмсүүгэ, доҕордоһууга истиҥ сыһыаны олохтуурга сытарын көрдөрдүбүт. Бу улахан тэрээһини иилээн – саҕалаан ыыппыт бары үлэһиттэргэ,салалталарга барҕа махталбытын тиэрдэбит. Хаҥаласпыт үрдүк аатын аттатан үрдүк таһымнаахтык кыттан кэлбиппитинэн, киэҥ тутуннубут,үгүс үтүө дьоннуун алтыһан астынан – дуоһуйан кэллибит. Лидия Харитонова.