Күндү биир дойдулаахтарбын, ытыктабыллаах тыыл, үлэ бэтэрээннэрин, сэрии сылларын оҕоло... — 8 мая 2026 г. в 22:22:55.806
Күндү биир дойдулаахтарбын, ытыктабыллаах тыыл, үлэ бэтэрээннэрин, сэрии сылларын оҕолорун, Чурапчы көһөрүллүүтүн кыттыылаахтарын улуус салалтатын уонна тус бэйэм ааппыттан 1941-1945 с.с. Аҕа дойду Улуу сэриитигэр Кыайыы өрөгөйдөөөх күнүнэн итиитик, истиҥник эҕэрдэлиибин! Бу күн киһи аймах устуоруйатыгар саамай улахан хаан тохтуулаах сэриини өрөгөйдөөхтүк түмүктээбит Ытык күн быһыытынан биһиги дойдубутугар үйэлэргэ бэлиэтэнэ туруо. Биһиэхэ бу – фашизмы, нацизмы утары уоттаах сэриигэ сырдык тыыннара быстыбыт саллааттары кэриэстээһин, кыргыһыы хонуутугар дьоруойдуу охсуспут уонна тыылга бэйэлэрин умнан туран үлэлээбит дьоммутунан киэн туттуу, кинилэргэ үрдүк махтаныы күнэ. Аныгы кэмҥэ фашизм, нацизм көрдүгэннээн сытан күөрэйбит кэмигэр ону суох оҥорор туһугар улууспут уола хаан буойуттара байыаннай дьайыыга дойду кэскилин туруулаһан чиэстээхтик киирсэ сылдьыыларынан, Сахабыт сириттэн Россия Геройа буолбут буойуттарбыт тугунан кэмнэммэт хорсун быһыыларынан киэн туттабыт, махтанабыт! Биһиги кинилэрдиин бииргэбит, тыылтан көмө, өйөбүл уҕараабат! Чурапчыттан сэриигэ 2170 киһи ыҥырыллан, 36 саллаат Берлини ылыыга кыттыбыта, 72 офицер саллааттары кимэн киириигэ киллэрбиттэрэ. Фашистары утары сэриигэ эр санааны уонна хорсун быһыыны көрдөрбүт биир дойдулаахтарбыт элбэх бойобуой уордьаннарынан, мэтээллэринэн наҕараадаламмыттара. Оттон 975 дьоммут сэрии толоонуттан дойдуларыгар эргиллибэтэхтэрэ... “Чурапчы алдьархайынан” ааттаммыт Аҕа дойду Улуу сэриитин сылларыгар Чурапчы 41 колхуоһун Саха сирин хотугу үс улуустарыгар, Өлүөнэ эбэ төрдүгэр күүс өттүнэн көһөрүү - биһиги улууспут оспот сырҕан бааһа. Кинилэри кэриэстиибит, саныыбыт, сүгүрүйэбит! Сталинград иһин кыырыктаах кыргыһыыга холооно суох хорсун быһыытынан Норуот Геройун аатын сүкпүт биир дойдулаахпыт Гавриил Протодьяконов сырдык аатыгар Дьокуускай куоракка Кыайыы пааркатыгар былырыын норуот күүһүнэн оҥоһуллубут пааматынньыгы арыйыы ону туоһулуур. Ийэ дойдуга ытык иэстэрин чиэстээхтик толорбут дьоммут килбиэннээх ааттарын үйэтии, кинилэр бойобуой суолларын сырдатыы үүнэр сүһүөх ыччаппытыгар Аҕа дойдуга ытыктабылы, бэриниилээх буолууну иҥэриэҕэр эрэлбит улахан. Буойуттар ааттара умнуллубат – үйэлэргэ тыыннаах! Улуу Кыайыы бырааһынньыгынан, күндү доҕоттор!