«Сир симэҕэ» быыстапка түмүктэннэ: А.С.Пушкин аатынан библиотекаҕа уһуйааччы Лена Пиниг... — 18 июня 2026 г. в 07:50:19.613
«Сир симэҕэ» быыстапка түмүктэннэ: А.С.Пушкин аатынан библиотекаҕа уһуйааччы Лена Пинигина үөрүүлээх тэрээһинэ ааста А.С. Пушкин аатынан Национальнай библиотека уораҕайыгар Ф.И. Авдеева аатынан Оҕо айымньытын дыбарыаһын ураты талааннаах уһуйааччыта, Саха сирин уран ууһа Лена Васильевна Пинигина «Сир симэҕэ» диэн ааттаах тус бэйэтин уруһуйдарын быыстапкатын үөрүүлээх сабыллыыта ситиһиилээхтик буолан ааста. Быыстапкаҕа Лена Васильевна сахатын сирин нарын айылҕатын, сир симэҕэ буолан үүммүт кэрэ сибэккилэрин дьүһүйбүт уруһуйдара кэлбит дьон болҕомун олус тартылар. Хас биирдии үлэ ураты истиҥ сылаас тыыннаах, айар кут дириҥ сүмэтин иҥэрбит буолан, көрөөччүлэри сөхтөрдө. Үөрүүлээх сабыллыыга «Үргэл» арт-галерея дириэктэрэ Спиридонов Ю.В., А.С. Пушкин аатынан национальнай библиотека үлэһиттэрэ, СО РАН культурологияҕа магистра Тагров В.Н., ХИФУ историяҕа билимин доцена, суруналыыс Степанова Е.В., Оҕо айымньытын дыбарыаһын этнокултуура киинин салайааччыта Яковлева Л.С., уһуйааччы аймахтара уонна Саха сирин айар эйгэтин сэҥээрээччилэр муһуннулар. Кинилэр Лена Васильевнаҕа уруһуйдьут уонна эдэр көлүөнэни иитэр-үөрэтэр мааны уһуйааччы быһыытынан махтанан туран, истиҥ эҕэрдэлэрин, сылаас алгыстарын тиэрдилэр. Тэрээһин олус истиҥ, доҕордуу эйгэҕэ ааста. Уһуйааччы Лена Пинигина уруһуйдарын уратытын, оҥоһуутун туһунан кэпсээн, кэлбит дьоҥҥо айар кут сылааһын бэлэхтээтэ. Күндү Лена Васильевнаны ураты кэрэ быыстапката ситиһиилээхтик ааспытынан ис сүүрэхтэн эҕэрдэлиибит! Өссө да уостубат айар куту, үөрэнээччилэргит ситиһиилэрин уонна ураты саҥа быыстапкалары баҕарабыт.