❤️«Сүрэх сылааһын иҥэрэн» – Лена Яковлева быыстапката түмүктэннэ
❤️«Сүрэх сылааһын иҥэрэн» – Лена Яковлева быыстапката түмүктэннэ Алтынньы 11 күнүгэр «Симэх» национальнай кииҥҥэ СӨ уус-уран оҥоһуктарын норуотун маастара, үрдүкү категориялаах уһуйааччы Лена Яковлева «Сүрэх сылааһын иҥэрэн» диэн тус быыстапкатын тэрээһинэ үрдүк таһымнаахтык түмүктэннэ.🎊 Быыстапка саалата бу күннэргэ дьикти иэйиинэн туолла. Дьокуускай олохтоохторо уонна ыалдьыттара тоҕуоруһа мустан, араас уһуйуу дьарыктарыгар кытыннылар. Көрдөрүүгэ турбут Лена Александровна ураты кэрэ оҥоһуктарын, ону тэҥэ ийэтэ Надежда Сергучева уонна балта Надежда Николаева үлэлэрин, көрбүт эрэ киһи сөҕө-махтайа көрдө. Хас биирдии сиик, өҥ — бу көлүөнэлэр ситимнэрэ, өбүгэ үгэһин аныгы кэмҥэ тиэрдии кэрэһитэ. Тэрээһин бочуоттаах ыалдьыттара: Любовь Христофорова, СӨ хотугу аҕыйах ахсааннаах төрүт олохтоох омуктарын ассоциациятын Бастакы вице-президенэ, Айна Иовлева, «Симэх» национальнай киин идэлээх үлэһитэ, Светлана Никифорова, «Айылгы» этнокультурнай киин салайааччыта, Татьяна Данилова, СӨ уус-уран оҥоһуктарын норуотун маастара, Мария Попова, үрдүкү категориялаах уһуйааччы, Лена Александровна айар үлэтэ Арассыыйаҕа эрэ буолбакка, тас дойдуларга тиийэ биһирэнэрин тоһоҕолоон бэлиэтээтилэр. Кини оҥоһуктара Францияҕа буолбут бэстибээлгэ, «Олонхо. Мир вещей. Этно-арт», «Дыхание Арктики» курдук улахан каталогтарга киирбиттэрэ бу — улахан ситиһии. СӨ «Дьиэрэй» оҕо образцовай коллективын салайааччыта, СӨ култууратын туйгуна Анастасия Третьякова «Дьылҕа хоруоҥкалара» ырыатын ыалдьыттар, оҕолор, төрөппүттэр астына иһиттилэр, ону тэҥэ кини Лена Александровна айбыт хоһоонун дорҕоонноохтук ааҕан мустубут дьону долгутта.👏🏻 «Көмүс сабынан, таптал сылаас уйатын ойуулаан, оһуордаан симээн, хас биирдии ойуум— мин сүрэҕим сылааһа, дууһам иэйиитэ», диэн Лена Александровна, хараҕа үөрүүнэн туолан туран сүгүрэйээччилэригэр махтанна. Уран тарбахтаах маастарбытыгар Лена Александровнаҕа айар кыаҕа уостубатын, саҥа үрдэллэри дабайа турарыгар баҕарабыт.✨ МАХ-канал ДДТ им. Ф.И. Авдеевой