#КультураСонуннара — 4 февраля 2026 г. в 21:11:55.543
#КультураСонуннара 💫*Үөһээ Бүлүү улууһун култууратын департамена уонна Николай Иванович Бойлохов аатынан оҕо искусствотын оскуолатын иһинэн тэриллибит бырайыагынан, "Саха" национальнай көрдөрөр иһитиннэрэр хампаанньа өйөбүлүнэн ыытыллар "Күн Оһуохайа" бырайыак бүгүҥҥэттэн үлэтин саҕалаата.* 💫Култуура миниистирэ Афанасий Иванович Ноев сарсыарда өттүгэр "Күн Оһуохайыгар" үлэлиэхтээх наставниктары кытта кэпсэттэ, бэйэтин санаатын үллэһиннэ, хас биирдии наставникка улахан болҕомто ууран "Күн Оһуохайа" логотиптаах бэлэхтэри туттартаата, ситиһиилээх үлэни баҕарда. 💫16:00 чаастан Арчы дьиэтигэр "Күн Оһуохайын" кыттыылаахтара 13 улуустан 100 оҕо муһунна, күрэх арыллыытыгар бырабыыталыстыба бэрэссэдээтэлин солбуйааччыта Сергей Васильевич Местников, култуура миниистирэ Афанасий Иванович Ноев, "Саха" НКИХ генеральнай дириэктэрэ Олег Олегович Марков, Үөһээ Бүлүүтээҕи оҕо искусствотын оскуолатын дириэктэрэ Анатолий Валерьевич Иванов уонна бырайыак ааптара Сахаайта Мойтохонова кытыннылар. Алгыс тылын эттэ, сиэри-туому оҥордо Бүлүү түбэтин Дархан оһуохайдьыта, СӨ Үтүөлээх этээччитэ, дьүүллүүр сүбэ чилиэнэ Валентина Егоровна Сухаринова. 💫Сергей Васильевич оҕолорго кыайыыны дьулууру баҕарда, саха тыла уонна төрүт култуура сайдыытыгар улахан кылааты киллэрэр уһуйааччыларга, оҕолорун бэлэмнээн ыыппыт төрөппүттэргэ уонна күрэх тэрийээччилэригэр ситиһиини баҕарда. Афанасий Иванович быйыл култуура сыла биллэриллибитинэн араас тэрээһиннэр буолалларын сырдатта, ол иһигэр биир улахан бырайыак "Күн Оһуохайа" буоларын бэлиэтээн туран оҕолор күн сардаҥатын курдук сырдыы, кэрэни түстүү, сырдыкка талаһа сылдьын диэн бары үчүгэйи баҕарда. 💫Наставниктар бүгүн сэрэбиэй быһыытынан үөрэтиэхтээх биэстии оҕолорун таллылар. Үлэни-хамнаһы саҕалаары көрсүһэн билсистилэр. "Күн Оһуохайа" бырайыагы олунньу 7 күнүттэн олунньу 14 күнүгэр диэри киэһээ аайы НВК ханаалга көрүҥ, кэрэни кэрэхсээҥ, эһиэкэйи эҥээриттэн оһуохайы оройуттан тутуҥ! 💫Оҕолорго ситиһиини! T.me/admvervil