Доруобуйа харыстабылын бэтэрээнэ Августа Петровна Окорокова 90 саастаах ытык юбилейын б... — 8 августа 2026 г. в 01:51:31.114
Доруобуйа харыстабылын бэтэрээнэ Августа Петровна Окорокова 90 саастаах ытык юбилейын бэлиэтээтэ👏🏼💐 Атырдьах ыйын 5 күнүгэр, доруобуйа харыстабылын үтүөлээх бэтэрээнэ🥼, үгүс дьон махталын уонна ытыктабылын ылбыт акушерка Августа Петровна Окорокова олоҕун үлүнэр үрдүк үктэлин — 90 саастаах ытык юбилейын туолла! Августа Петровна — үйэ аҥарын кэриҥэ кэмҥэ дьон доруобуйатын туһугар бэриниилээхтик үлэлээбит дьоһун мааны үлэһит, наставник. Кини ааспыт үйэ 70-80-с сылларыгар Майатааҕы роддомҥа өр сылларга акушерканан бэриниилээхтик үлэлээбитэ🥼👼🏼. Ол сылларга хас эмэ сүүс, тыһыынча саха оҕотугар күн сирин көрөрүгэр көмөлөһөн, маҥнайгынан илиитигэр туппут үтүөкэннээх, идэтигэр бэриниилээх үлэhит этэ. Кэлин Т. Е. Сосин аатынан Бүтэйдээх балыыһатыгар сиэстэрэнэн үлэлээн, дьоҥҥо-сэргэҕэ өссө ордук чугаһаан, үрдүк таһымнаах мэдицинискэй көмөнү оҥорон, үтүө суобастаахтык үлэлээн биэнсийэҕэ тахсыбыта. Бу үөрүүлээх үбүлүөйдээх күнүнэн бэтэрээни эҕэрдэлии улуус киин балыыһатын кылаабынай бырааһа Иннокентий Егорович Павлов анал баран тиийдэ. Кини өр сылларга доруобуйа харыстабылын сайдыытыгар киллэрбит үтүөлээх, уһулуччулаах кылаатын иһин Августа Петровнаҕа «Доруобуйа харыстабылын Бочуоттаах бэтэрээнэ» диэн үрдүк аат иҥэриллибит бэлиэтин уонна истиҥ эҕэрдэ суругун үөрүүлээх быһыыга-майгыга туттарда. Ону тэҥэ, Майатааҕы роддомҥа өр сылларга бииргэ үлэлээбит үөлээннээҕэ, бэтэрээн акушерка Февронья Николаевна Скрябина кэлэн истиҥ ахтыытын үллэһиннэ🤗, урукку сыллардааҕы сыралаах, ол эрээри кэрэ-бэлиэ үлэлэрин туһунан сылаастык ахтан ааста. Киин балыыһа уонна профсоюз кэмитиэтин аатыттан юбилейдаах бэтэрээҥҥэ өйдөбүнньүк сыаналаах бэлэхтэри туттардылар. Августа Петровнаҕа уонна кини чугас дьонугар кытаанах доруобуйаны💎, уһун үйэни, дьолу-соргуну уонна чугас дьонун сылаас сыһыанын баҕарабыт💐!