Гомер юлының кадерле мизгелләре: 70 яшьтә очрашу. — 17 августа 2026 г. в 06:10:05.633
Гомер юлының кадерле мизгелләре: 70 яшьтә очрашу. Кеше исән чакта гомер буена онытылмаслык хәтирәләр калдырган чор — ул мәктәп еллары. Сабакташларны кайда гына очратсаң да, сүз һәрвакыт мәктәп елларына барып тоташа. Еллар бик тиз үтә: әле генә Тушкыр сигезьеллык мәктәбен тәмамлауга 40 ел, Штәнде урта мәктәбен бетерүгә 45-50 ел дип очрашкан идек, быел инде һәрберебезгә 70 яшь тулды. Шул уңайдан очрашу үткәрдек. Очрашуны һәрвакыттагыча мәчеттән башладык. Вафат булган укытучыларыбыз һәм сабакташларыбызның рухларына багышлап Коръән укыттык. Мәчеттә әрвахларны сөендерү күңелгә үзенчәлекле бер җиңеллек өсти. Коръәнне классташыбызның тормыш иптәше Мәүлитьян Ахтариев укыды. Догалардан соң, ашыкмыйча, озак кына утырдык. Аларның барысының да урыннары оҗмахта булсын. Аянычлысы шул: һәр очрашу саен арабыздан кемдер бакыйлыкка күчкән була... Безнең буын китап укып үсте, шигырьләрне яраттык. Шуңа да китапханәгә керү безнең өчен аерым бер вакыйга булды. Авылыбызның данлыклы кешеләре стендында классташларыбызның фотоларын күргәч, горурлык хисләре кичердек. Музейда исә һәр экспонат янында тукталып, Зәйнәп Гафарованың җентекләп сөйләвен кызыксынып тыңладык. 70 яшьтә дә кешедә шундый кызыксынучанлык, белергә омтылу булуы сокландыра. Әнкәйләребезнең кул эшләре, үзебез үскән чорның тарихи әйберләре күз алдыбыздан гомер юлыбызны үткәрде. https://baltachtan.ru/news/novosti/2026-08-17/gomer-yulyny-kaderle-mizgell-re-70-yasht-ochrashu-4784153 ────────────── Комментировать ›