Кырык алты ел дәвамында Балтач укучыларын белем үрләренә әйди.
Кырык алты ел дәвамында Балтач укучыларын белем үрләренә әйди. Балтач районы Иске Балтач 1нче урта мәктәбенең югары категорияле башкорт теле һәм әдәбияты укытучысы Роза Хәйрулла кызы Тимергалиева — күп буын укучыларны белем үрләренә алып менгән тәҗрибәле педагог. Аның ярты гасырга якын дәвам иткән мөгаллимлек юлы — үзе бер дәвер. Районыбызның Иске Яхшый авылы кызы Роза Хәйрулла кызы хезмәт юлын Тучыбай мәктәбендә озайтылган көн төркеме тәрбиячесе булып башлый. Балалар белән тиз уртак тел таба, һәр көнен сагынып, янып эшли. Бер елдан аны Сәйтәк мәктәбенә өлкән пионервожатый итеп күчерәләр. Биредә аның тормышы тагын да җанлана: патриотик чаралар, кызыклы очрашулар, укучыларның кайнар хисләре... Киләчәген мәктәп белән бәйләргә карар кылган яшь кыз Бөре дәүләт педагогия институтына укырга керә. Филология факультетында белем алу аңа илһам бирә, һәр дәресне сусаган кеше кебек үзләштерә. Педагогик эшчәнлеген ул туган авылы — Иске Яхшый мәктәбендә дәвам итә. Туган тел укытучысы буларак, ул үзен судагы балыктай иркен хис итә һәм бу һөнәрне сайлавына беркайчан да үкенми. Мәктәп ябылганнан соң, Роза Хәйрулла кызы Иске Балтач 1нче урта мәктәбенә күчә һәм бүген дә шунда уңышлы эшли. — Тәүдә татар теле һәм әдәбиятыннан укыттым. Аннары квалификация күтәрү курсларында белемемне камилләштереп, башкорт телен укыта башладым. Эшемне бик яратам. Дәүләт теле буларак, башкорт теле барлык классларда да зур кызыксыну белән өйрәнелә, — ди ул. https://baltachtan.ru/news/novosti/2026-10-02/kyryk-alty-el-d-vamynda-baltach-ukuchylaryn-belem-rl-ren-ydi-4832998 ────────────── Комментировать ›