Илгиз Субушев: «Батырларыбызның истәлеге – безнең йөрәкләрдә».
Илгиз Субушев: «Батырларыбызның истәлеге – безнең йөрәкләрдә». Республика көнен бәйрәм иткән көннәрдә Балтач районында бик тә тәэсирле һәм җаваплы чара узды. Район хакимияте башлыгы Илгиз Субушев махсус хәрби операциядә һәлак булган якташларыбызның гаиләләренә дәүләт бүләкләрен тапшырды. Бу көнне залдагы һәркемнең күңелендә горурлык белән беррәттән тирән сагыш та ята иде. Ватан иминлеге өчен үз гомерләрен кызганмаган егетләребезнең батырлыгы – бүгенге буын өчен олы үрнәк. Россия Президенты Указы белән «Батырлык ордены»на лаек булган каһарманнарыбызның исемнәре тарих битләренә алтын хәрефләр белән язылды: Самат Маснавиев (Тушкыр авылы) – бүләкне әнисе Фәйрүзә Вәлиәхмәтова кабул итеп алды. Евгений Шайбаков (Югары Янактай авылы) – бүләкне әнисе Маруся Әхмәдҗанова алды. Анатолий Рахматиев (Тибел авылы) – бүләк аның сеңлесе Гөлчәчәк Гыйльмөхәммәтовага тапшырылды. Альмир Карамов (Көндәшле авылы) – бүләкне әнисе Рәүфә Карамова кабул итте. Шулай ук, Түбән Янактай авылы егете, старшина Арнольд Гайнитдинов та «Махсус хәрби операциядә катнашучы» медале белән (үлгәннән соң) бүләкләнде. Бүләк аның тормыш иптәше Наталья Гайнитдиновага тапшырылды. Тантана барышында һәлак булганнар истәлегенә бер минутлык тынлык игълан ителде. Илгиз Әхвәс улы чыгышында бу гаиләләрнең кайгысын уртаклашты: — Сезнең улларыгыз, ирләрегез – чын батырлар. Аларның истәлеген саклау – безнең изге бурычыбыз. Тыныч тормыш хакына үз гомерләрен биргән якташларыбыз алдында баш иям, — диде район башлыгы. Бу чара тагын бер кат күрсәтте: Балтач халкы үз геройларын онытмый, аларның якыннарына һәрвакыт ярдәм кулы сузарга әзер һәм бердәм булып кала. https://baltachtan.ru/news/novosti/2026-10-14/ilgiz-subushev-batyrlarybyzny-ist-lege-bezne-y-r-kl-rd-4843968