Эрямонзо алтызе Тиринь масторонь ванстомантень
Эрямонзо алтызе Тиринь масторонь ванстомантень Минь поладтано минек региононь геройтнеде сермадовксонь цикланть, конатнень ули меленек невтемс Президентэнь грантонь фондонь 25-2-014940 «Сила, мужество и вера»: передвижная выставка-хронограф» проектэнть лувсо. Течи содавттадызь Мордовия Республикава Российской Федерациянь ФСБ-нь Управлениянь важодицянть марто. Зыянов командировкав туемстэ, ламот важодицятне парсте велявтыть. Ризксэнтень, истя эрси аволь свал. Вейке истямо командировкась майоронть Владимир Иванович Ненюковонь туртов кармась меельцекс. Владимир Иванович чачсь 1974 иень июнень 19-це чистэ Саранскойсэ. Ошонь 14 № средней школанть прядомадо мейле, кармась тонавтнеме ды парсте прядызе Н.П. Огарев лемсэ МГУ-нь строительной факультетэнть «Промышленное и гражданское строительство» специальностенть коряс. 1996 иестэ, тонавтнеманть прядомадо мейле, сон саезель военной службас Мордовия Республикава РФ-нь ФСБ-нь Управленияв. Ды эрямонь покш пельксэнть алтызе Тиринь масторонь сэтьмечинь топавтомантень. Службасо невтизе прянзо паро ендо. Секскак аволь стяко служебной тевтеемань зярыя иетнень ютазь сон аравтозель Управлениянь подразделениятнестэ вейкенть прявтокс. 2004 иестэ сонзэ кучизь службань ютамо северокавказской регионтнэстэ вейкентень. Владимир Иванович апак кавтолдо согласясь. Северной Кавказсо сонензэ аволь весть савкшнось улемс контртеррористической операциятнесэ. Боевой тевтнень топавтомсто вадря невтевкстнэнь кисэ сон казевсь ведомствань наградатнесэ, конатнень ютксо «За участие в контртеррористической деятельности» Россиянь ФСБ-нь медалесь. 2005 иень ноябрянь 3-це чистэ бандформированиянь участниктнень нейтрализациянь коряс боевой спецоперациянь ютавтомсто автомобилесь, косо ульнесь Владимир Иванович, леднезель, сон жо стакасто ранязель, мезень кувалма эрямозо сезевсь. Боевой условиятнесэ невтезь мужестванть ды героизманть кисэ Ненюков Владимир Иванович казезь Мужествань орденсэ (куломадонзо мейле). Управлениянь офицерэнь собраниянь Советэнть решениянзо коряс Ненюков Владимир Ивановичень лемезэ пингеде-пингес совавтозь Мордовия Республикава Российской Федерациянь ФСБ-нь Управлениянь сотрудниктнень спискатнес. Юлия Бурова, «Национальная безопасность и наука» ИАЦ-нь АНО-нь прявт