Содамочитнень нолды тевс эрьва чинь эрямосонть
Содамочитнень нолды тевс эрьва чинь эрямосонть Рузаевкань эрицянть Александр Рунковонь лавтовонзо удало – десантно-штурмовой войскатнесэ срочной службась, мейле Северной Кавказсо «пси» таркатнесэ службась. Сонзэ улить ламо казнензэ. Специальной военной операциянть ушодовомадо икеле Александр важодсь республикань предприятиятнестэ вейкесэнть. 2022 иень сентябрясто сермадстсь Миноборонанть марто контракт. «Мон кирдинь сюлмот цератнень марто, конат уш ульнесть СВО-нь ютавтомань таркасонть, ды чарькодинь, тосо монь содамочитне ды маштомачитне кармить лезэвекс. Лиякс теемс эзинь машто», – евтызе мелензэ сон. СВО-со Александр служась Краснолиманской енкссо штурмовой взводонь командирэкс. БТР-сь, конасонть сон ульнесь, сезевсь противопехотной минасо. Осколкасо пек томбазель керш сельмесь, тень кувалма церась малав сокоргадсь, ды мейле сонензэ путозель протез. Военно-врачебной комиссиясь ловизе Александр Рунковонь военной службас а маштовиксэкс. Госпитальсэ лецямодо мейле сон велявтсь тиринь республикав, косо поладызе службанзо контрактонь коряс военной службас кочкамонь Саранскоень пунктсонть. Ней Александр важоди Рузаевкасо «Хлебная база» АО-со сюронь ванстомань механизированной таркатнень прявтокс. Истя жо сон, кода СВО-нь ветеранось ды Тиринь масторонь патриотось, вети военно-патриотической важодема од ломантнень марто – яки школатнес, средней специально-учебной заведениятнес, вастневи школасо тонавтницятнень ды студенттнэнь марто. Александр Рунков – «Герои среди СВОих» региононь программань прядыця. Сонзэ превс путыцякс ульнесь МР-нь цифровой развитиянь ды массовой коммуникациянь министрась Наталья Санина. «Монень пек ламо макссь «Герои среди СВОих» программанть коряс тонавтнемась, карминь содамо аволь аламо лезэв, теевинь содавиксэкс мельстуиця ломань марто, – евтнесь Александр Рунков. – Пурназь содамочитнень арсян нолдамс тевс эрьва чинь эрямосонть ды важодемасонть». Кеме тылэзэ – ояксчисэ эриця покш семиязо, Анна низэ ды 4 эйкакшонзо – 18 иесэ Ксения, 16 иесэ Ярослав, 12 иесэ Илья ды 3 иесэ Святослав. «Семиясь – те монь лезксэм ды нежем», – тешкстызе ламо эйкакшонь триця тетясь.