Михаил Олькин: «Шкинемась эрямосон саи покш тарка»
Михаил Олькин: «Шкинемась эрямосон саи покш тарка» Саранскоень эрицясь Михаил Олькин малав 32 иеть важоди илевсто кодамонь тевсэнть. 17 иесэ Мишанень сазорозо казекшнесь «Плетение из лозы» книга, косо невтезель схема, кода кодамс кептере. Сынст семияст творческой: тетязо ветиль кружок, косо тонавтнесть пластилинстэ тейнеме эрьва кодамо фигуркат, бабазо кодась – тененьгак тонавтызе нуцьканзо. Ламо иетнень перть церанть ерокчизэ, нама, кассь. А стяко 2023 иестэ сонензэ максозель «Россиянь раськень мастер» лемесь. Илевсто кодамось, Михаил Юрьевичень важодемадонзо вельде, Мордовиясо саи промыслатнень ды ремеслатнень ютксо покш тарка. Теньсэ ули путовксозо Михаил Юрьевиченьгак. Тевс нолдавить калень тарадтнэ. Мастерэсь материалонть аноксты октябрянь перть. – Эрявикс каленть муемс а шожда. Илевтнень ватксемадо мейле кувать шкас лопавтьсызь лакиведьсэ, тенде сынь теевить чевтекс ды молить пештень тюс енов. Эсь важодевкстнэнь теян ансяк паро илевсто, эйзэст путан ламо вий, шка ды вечкема, – корты мастерэсь. Ульнесь шка, зярдо Михаил Юрьевич тукшнось Московонь Кобяковской фабрикав, косо илевсто тейнить кодавкст. Тосо церанть васня вастызь а кемезь. Мик сестэяк стакаль тенст кемемс, зярдо мастерэсь невтсь фотот. Секскак маштомачинть эрявсь невтемс тевсэ. – Важодема графикесь фабрикасонть стакаль. Заказтнэ эрсильть эрьва кодат, арасель шка стямс ды шождалгавтомс рунгонть, чистэнть эрявсь кодамс малав 6 кептереть. Тосо важодинь кавто иеть, мейле туинь ды мартон саинь уш овсе лия маштомачить. Одсто Михаил Юрьевич тонавтнесь кавто специальностень коряс: дирижер ды бухгалтер. Ней сон профессиональной музыкант, И.М. Яушев лемсэ оперань ды балетэнь театрань хоронь артист. Юткошкасто ламо мель яви илевсто кодамонтень, тейни мебель ды интерьерэнь туртов мазый ды эрявикс предметт. Михаил Олькинэнь сехте покш важодевксэнзэ – Саранскоень иневанькс праведной воинэнть Феодор Ушаковонь соборонь ды иневанькс Софиянь соборонь макеттнэ, конатне ней аштить Грециясо – Комотини ошонь «Рома» музейсэ. Михаил Олькин – эрьва кодамо пелькстамонь ды выставкань участник. Мордовиянь «Мастер года» изобразительной ды декоративно-прикладной шкинемань пелькстамонь Гран-принь нилексть саиця. Аволь умок Кировской областьсэ лозоплетениянь Весероссиянь VI-це фестивальсэнть Михаил Олькин невтизе, кодат мастерт улить минек енкссо. Сон пелькстась Россиянь келес 34 участниктнень ютксо ды сайсь почетонь омбоце тарка. Сонзэ авторской тронозо пек тусь жюринть мельс, а «Сударыня» импровизированной кептересь, конась теезель пелькстамонть шкасто, невтизе мастерэнть ерокчинзэ. – Кенярдан, удалась вастовомс ды кортнемс эрьва кодамо регионсто лия мастертнэнь марто, саемс пельдест те тевсэнть од мельть-арсемат, содамочить. Фестивалесь прядовсь «Двуречье» ошонь парксо калень аллеянь путомасо, косо кедьчелькевтне озавтсть 14 куракшт – вейкень-вейкень эрьва региононть пельде. Сюкпря жюринтень монень покш питнень путоманть кис. Седе тогак карман бажамо тееме мазычи. Кудов ардомсто совинь Марий Элсэ эриця Виталий Кудрявцев ялганть содавтомо, конась истя жо яви мель илевсто кодамонтень, ды сон керсесь калень илевонь покш оровт седе тов важодемантень, – кортась Михаил Юрьевич. Сентябрянь 9-це чистэ эрзянь ды мокшонь раськень культурань музейсэ панжови Михаил Олькинэнь ды Сергей Глуховонь вейсэнь выставка. Неень шкасто мастерэсь тов аноксты од кодавкст. Яна Зеткина Фототне Михаил Олькинэнь архивстэ.