Вешнесть кулявтомо ёмазь солдаттнэнь
Вешнесть кулявтомо ёмазь солдаттнэнь Августонь 10–24-це читнестэ Н.А. Кручинкин лемсэ «Поиск» Мордовиянь патриотической вейсэндявксонь отрядось якась «Западный фронт. Варшавское шоссе» военно-исторической раськеютконь экспедицияв. Сон ютась Калужской областень Барятинской районсо. Важодематнень ветясть кавто таркава кавто группат. Ромодановань районсто ниле ломантнень ветясь И.А. Селеверстов, лагерест сынь панжтнизь Барятинской райононь Дегонка велесэнть. Вешнесть кулявтомо емазь солдаттнэнь. Экспедициясонть од ломантне ванкшнызь Быково ды Борец велетнень вакссо таркатнень. Быково велень ветерантнэнь ды эрицятнень ледстнемаст вельде муевсть неть таркатне, тенень лездась аэрофотоснимкаськак. Лия отрядонть, ков совасть 34 ломанть, ветясь Л.А. Гунькина (сон Сыре Шайговань А. М. Кижеватов лемсэ «Эхо войны» поисковой отрядонь прявт). Сынст лагерест аштесь раськеютконь экспедициянь прявт ютавтомань таркасонть. Солдаттнэнь вешнемась мольсь Зубровка веленть маласо вирьсэ ды од таркасо – Яковлевка веленть вакссо, сонзэ муизь тундонь экспедициясто. Тосо важодемстэ «Поиск» отрядось мусь ды таргась колмо боецэнь ловажат. «Западный фронт. Варшавское шоссе» военно-исторической экспедициянть важодема шкасто муезельть Якстере Армиянь 109 боецэнь ловажат. Весе сынь одс калмазельть Цветовка веленть вакссо воинской калмазырьсэ. Муезельть солдатонь сисем медальонт, колмотне ловновсть, вейкесь кучозель экспертизав. Истя жо мусть пенчть, косо сермадозельть тюрицятнень лемстэст букват, именной монетница ды мундштук. Красноармейской книжкась истя жо кучовсь экспертизав. Покш экспедициянть пекстамсто од ломантне казевсть РФ-нь Оборонань министерстванть пельде «За отличие в Поисковом движении» 3-це степенень тешкссэ. Ютксост Н.А. Кручинкин лемсэ «Поиск» Мордовиянь патриотической вейсэндявксонь отрядонь 7 боецтнэяк. Минек поисковиктне те экспедициянть алтызь Сергей Новиковонь ледстнемга, поисковой движениясо сон ульнесь 2006 иестэ саезь, мукшнось ламо солдатт. 2026 иень июльстэ апак учне тусь эрямосто, вейке ковдо эзть топодекшне тензэ 37 иеть. Те экспедициясонть сонзэ казиксэлизь, ней награданть максызь малавиксэнзэ туртов. Татьяна Маторкина