❗⚡«Посылкась» стясь миллиондо ламо целковойть
❗⚡«Посылкась» стясь миллиондо ламо целковойть «Краснослободский» Россиянь МВД-нь ММО-нь 12 № полициянь отделенияс пшкадсь Сыре Шайговань райононь 65 иесэ эрицясь, конась пачтясь 1 млн 130 тежат целковоензэ манязь саламодо. Зыянс понгозенть валонзо коряс, сонензэ гайневтсь а содавикс ава, конась пачтясь, келя, мирденстэнь сась посылка. Тенст пачтямга эряви евтамс СМС вельде сазь кодонть. Авась евтызе, теде мейле а содавикс гайневтицясь лоткавтызе кортамонть. Пенсионеркась талнозевсь ды арсезевсь, паряк, те мошенница. Ды ардсь МФЦв, косо полавтызе Госуслугатнесэ личной кабинетстэ пароленть. Омбоце чистэ сон сась мельс кемекстамс, што весемесь вадря, ды Интернетэнь сетьсэ муизе буто МФЦ-нь пси линиянь телефононть. Каршонзо кортыцясь толковизе лисезь тевенть, теде мейле авантень а содавикс номерстэ гайневтсь буто банконь важодиця, конась пачтясь, аванть данноензэ содавикст весенень, секс ули пелема мошенниктнеде, истя жо мерсь, келя, банконь счетстонзо уш кие-бути бажась саемс 150 тежат целковойть ВСУв кучомга. Мерсь, ванстовиця сонсензэ ды мирдензэ ярмактнень шкань апак таргсе путомат безопасной счетс. Теде мейле аванть марто сюлмавсь буто ФСБ-нь важодиця, конань пельде сон марясь корязонзо уголовной тевень ушодомадо ды кармавтсь теде киненьгак а евтнемс. Нама, авась ды мирдезэ саизь банксто ванстовиця ярмакост. Чокшне тенст сась курьер, ды сынь максызь тензэ весе чондаст, конатнень, тевенть парсте прядовомадо мейле, алтасть велявтомс. Шкань ютазь, пенсионертнэ фатясть, кодамо зыянс сынь понгсть, ды пшкадсть полицияв. МР-ва МВД-сь тагояк кармавты: асодавикстнэнень зярдояк илядо пачтя СМС вельде сыця кодтнэнь, парольтнень ды эсь данноенк, мик сестэяк, зярдо евтасызь пряст банксо, государственной сервистнэсэ ды правоохранительной органтнэсэ важодицякс. Сеске лоткавтынк асодавикстнэнь марто кортамонть.