Юнармеец, волонтёр, профорг ды студентка-филолог
Юнармеец, волонтёр, профорг ды студентка-филолог Мордовия Республикань Чаунзань райононь Покш Эрьмезенка велесэ чачозесь Анастасия Ботайкина течи тонавтни Н.П. Огарев лемсэ МГУ-нь филологиянь факультетсэ. Тейтеренть лавтовонзо удало покш тевть: паро тонавтнема, юнармейской движения, волонтерства, пелькстамотнесэ изнямот ды «Артексэ» улема. 1-це классто саезь 3-це классос Настя тонавтнесь Покш Эрьмезенкань школасо, мейле тонавтнеманзо поладызе Покш Маризь велень школасо. Тонавтнема иетне кармасть сонзэ туртов аволь ансяк содамочинь пурнамонь шкакс, истя жо общественной тевтнесэ ерокчинь невтемакскак. Сон ульнесь юнармейской отрядонь командирэкс, «Панжадо седейть» волонтеронь отрядонь членэкс ды школань советэнь председателекс. Тейтересь свал бажась тонавтнемс «ветес» ды теке шкасто топавтсь общественной тевть. Истямо тонавтнема лувось эзь кадово апак редя. 2025 иестэ Настя изнясь «Мир возможностей» пелькстамосонть, конань казнекс кармась «Артек» эйкакшонь Раськеютконь центрав «КЛАССное время» 10-це сменантень путевкась. – «Артекев» молемась кадови мельс весе эрямонь перть. «КЛАССное время» сменась казсь тень масторонь эрьва кодамо регионсто од ялгат, мельстуиця проектт ды возможность невтемс эсь прянть командасо. Мон эсь перькан неинь ламо эряза, икелев бажиця эйкакшт, ды те макссь тень седеяк покш кемема сенень, апак пеле эряви молемс икелев. «Артекесь» тонавтымим эрьва тевентень путомо питне ды панжи ламо кить-янт сетнень икеле, кить а пелить арсеме ды тевень тееме, – корты Настя. Течи Анастасия полады вузсо тонавтнеманть ды эрьва мейсэ ерокчинзэ невтеманть. Сон покш мель яви университетэнь эрямонтень: васенце курсонь тонавтницянь чинть тешкстамонтень алтазь кенярксчисэнть сайсь 1-це тарка, Профсоюзонь активень 31-це школань цетамотнень коряс сон совась университетэнь кемень сехте вадря профоргтнень юткс. Неть изнявкстнэнь экшсэ – дисциплинась, ответственностесь ды командасо важодеме маштомачись. Анастасия Ботайкинань эрямозо – паро невтевкс Чаунза буень ды весе Мордовиянь од ломантнень туртов. Бути улить бажамот ды икелепелев арсемат, сестэ изнявить весе стакачитне ды топавтовить мельтне-бажамотне. Яна Зеткина Фотось Настя Ботайкинань архивстэ.