Геройтнень лемест а стувтомга
Геройтнень лемест а стувтомга Мордовиясо ветяви покш важодема специальной военной операциясо маштовозь участниктнеде ледстнематнень а стувтомга. Мордовия Республикава «Защитники Отечества» Государственной фондонь филиалось ды сонзэ координатортнэ весемесэ лездыть геройтненень мемориальной комплексэнь, ледстнемань лазонь, героень партань, музеень ды муралонь панжомань мероприятиятнесэ. Невтемакс, Саранскоень 28 № школань зданиянь стенасонть панжовсь мемориальной лаз те тонавтнема заведениянь прядыцянть, СВО-нь участникенть Олег Сергеевень лемс. Суворовонь орденэнь 15 башка гвардейской мотострелковой бригадань гвардиянь ефрейторось Олег Сергеев героически маштовсь 2024 иень августонь 21-це чистэ. Мемориальной лазонь панжомасонть ульнесть ламо инжеть, ветерант, Олегень боевой оянзо, малавиксэнзэ, авазо, конась кастсь а пелиця алкуксонь цера. А вана Атюрьевань райононь Перевесьевской велесэ ютавтозель мероприятия специальной военной операциянь таркатнесэ маштовозтнень Владимир Паркинэнь ды Александр Кабаевень лемест а стувтомга. Тей сакшность почетной инжеть, райононь администрациянь важодицят, военной комиссарось, маштовозтнень тетяст-аваст ды малавиксэст… – Минек енкссо чачозтнень подвигтнеде ледстнематнень ванстомась – те аволь ансяк цератненень мельявома. Те сыця од ломантнень кастомасо юр. Геройтнень лемест а стувтомга миненек эряви теемс весементь, кадык эрьвась лангстост саи пример, – тешкстась МР-ва «Защитники Отечества» Госфондонь филиалонь прявтось Алексей Герасименко.