❗❗89 иесэ пенсионерэсь кадовсь 7,5 миллионт целковойтеме
❗❗89 иесэ пенсионерэсь кадовсь 7,5 миллионт целковойтеме Саранскойга Россиянь УМВД-нь 3-це № ОП-нь дежурной частев пшкадсь 89 иесэ тесэнь эрицясь, конась пачтясь 7 миллионт 520 тежат целковоензэ саламодо. Сыре ломаненть валонзо коряс, сонензэ гайневтсь а содавикс ломань, конась евтызе прянзо заводонь директоронь советникекс, косо ютазь шкатнестэ важодекшнесь пенсионерэсь, ды пачтясь, келя, кие-бути салынзе предприятиясонть улиця персональной данноензэ, конатнень вельде мошенниктне кучиксэльть ярмакт Украинав. А содавиксэсь седе тов толковась, келя, пенсионерэнть телефонозо кунсолови, мезенть кувалма рамама од ды эйзэнзэ аравтома мессенджерэнь приложениянть. Сыре ломанесь топавтызе кармавтоманть. Седе тов церанть марто сюлмавсь «банконь важодицясь», сон толковась, келя, анализэнть туртов эрявить евтамс банктнесэ ванстовиця ярмактонзо даннойтнень. Пенсионерэсь, нама, евтнинзе. Теде мейле мошенниктне ушодызь эсь рудазов тевест – атянть кармавтызь банктнестэ саемс ярмаконзо. Истя, зярыя чинь перть сыре ломанесь банктнестэ, конатнесэ ванстовсть ярмаконзо, сайнинзе сынст 2,5 миллионт целковоень туросо. Аферисттнэнь кармавтомаст кунсолозь, ярмактнень сон тапарилинзе газета потс ды кандылинзе евтазь таркас. Мик паролесткак ульнесь: «Весь чопода» («Ночь темная»). Мошенниктне кодаяк эзть кадо сыре ломаненть, таго тензэ гайневтсть. Тень кувалма сон мольсь банков эште вете вкладонь пекстамо, весемезэ 1 миллион 750 тежат целковоень покшолмасо. Ансяк тесэ сонзэ лоткавтызь банконь важодицятне. Сынь гайневтсть церанстэнь, конась сась кисэнзэ банков. Атясь ялатеке эзь кеме, што понгсь мошенниктнень «раужо» тевезэст, сась мельс гайневтемс заводонь прявтонтень, конась мерсь, келя, тесэ ванстовиця данноензэ кияк эзинзе салсе. Нама, пенсионерэнтень савсь лезкс мельга пшкадемс полицияв. Мордовия Республикава МВД-сь кармавты ломантненень ваномс пштистэ ды а максомс прянть манямс. Киненьгак илядо евтне куш косо ванстовиця ярмактонк. Банксо, правоохранительной органтнэсэ ды государственной структуратнесэ важодицятне зярдояк а кармавтыть ярмаконь кучомо, телефонга а вешить смс вельде сазь кодт ды банконь картань даннойть.