Вирь Тавласо тешкстызь Сыре ломанень ковонть
Вирь Тавласо тешкстызь Сыре ломанень ковонть Вирь Тавлань Культурань кудосо ютась лембе ды мельстуиця вастовома, кона алтазель Сыре ломанень ковонтень. Тей пурнавкшность сетне, кить умок уш пенсиясот, кить вечксызь тиринь велест. Кенярксчись ушодовсь казнемасто. Кочкурбуень прявтось Светлана Герасимова тешкстынзе велень эрицятнень, конат важодемасост тейсть покш путовкс чачома енксонть виевгавтомантень. Велень прявтось Елена Аверьянова евтась лембе валт Светлана Николаевнань пельде ды явшесь благодарственной сермат. Вирь Тавласо эрить тиринь масторонь алкуксонь патриотт. Седе тов ушодовсь концертэсь. Кенярксчинь программанть панжизе Культурань кудонь прявтось Владимир Завьялов. Покш чинтень сакшность инжетькак. Красномайский поселкань «Раздолье» ансамблясь казсь ламо паро ежомарямот, ваныцятне артисттнэнь вастызь виев цяпамосо. Илья Савин тей пачколесь Краснослободской районсто. Эх, кода сон седи баянсо! Церынесь сединзе весенень содавикс мелодиятнень, пурнавозтне весе вейсэ паро мельсэ морасть. Пакся Тавлань «Толава» фольклорной ансамблясь васня морась эрзянь кезэрень морот, мейле ютась рузонсетнес, ломантне мик лиснесть киштеме. Моротнеде башка, те чокшнесэнть гайгсть стихтькак. Сынст ловность Надежда Баляйкина ды Татьяна Гагарина. Велень эрицятне евтыть седейшкавань лембе валт те вастовоманть ютавтыцятненень: Ангелина Баляйкинанень, Ева Гагаринанень, Надежда Баляйкинанень, Владимир Завьяловнень.