Астæуккаг ахуырады рацарæзт – царды — 13 июля 2026 г. в 12:12:55.895
Астæуккаг ахуырады рацарæзт – царды «Профессионалитет» Уæрæсейы паддзахадон проекттæй иу у, скъолаты рауагъдонтæн дæтты хорз фадат дæсны специалист суæвынæн. Уый тыххæй конкурсы уагыл астæуккаг профессион ахуырады куыстуæттæ сæ архайд сбæттынц регионты организацитимæ, ахуырадон æмæ куыстадон практикæ фæцæуы сæ бындурыл. Организацийы кусджытæ та свæййынц студентты хъомылгæнджытæ. Архайд царды куыд ахады, уыимæ бынаты базонгæ уæвыны охыл нæ уацхæссæг бабæрæг кодта, ацы аз июлы 65 азы кæуыл сæххæст, уыцы «Модæйы индустрийы дзæуджыхъæуккаг колледж». Рог промышленность нæ республикæйы рæзты къахыл лæуд у, бонæй-бонмæ гом кæнынц ательетæ, чысыл хуыйæн фабрикæтæ. Хуыйæн куыстуат «БТК групп» егъау у, проекты фæрцы колледж сси йæ иу хай. Бадзырд-мæ гæсгæ ацы аз куыстуатæй нысанмæарæзт балцæгтимæ æрбарвитдзысты æртæ адæймаджы, колледж каст куы фæуой, уæд сæ куысты бынæттæ уыдзысты цæттæ. Студенттæн хорз бындур ис куыстадон практикæ ацæуынæн, фидæны сæ пъланты ис куыстдæттæджы хардзæй студенттæн стипендитæ дæттын. Колледж æнгом баст у Хетæгкаты Къостайы номыл университеты рог промышленность, дизайн æмæ конструкцитæ кæнæн кафедрæимæ. Аттестацийы экспертон æхсæнады уæнгтæ сты куыстдæтджытæ, науæд уæлдæр профилон ахуыргæнæндоны минæвæрттæ. Колледжы рауагъдонтæ – технологты кæронбæттæн аттестацийæн аргъгæнæг уыд ЦИПУ-йы бæстæзонæн наукæты факультеты рог промышленносты дизайны кафедрæйы ахуыргæнæг Баймæтаты Иринæ: – Практикон фæлварæн кæронмæ фæхæццæ кæны. Тынг хорз цæттæдзинад равдыстой. Хæслæвæрд бацæттæ кæнынæн цы рæстæг уагъд æрцыд, уым иттæг хорз бацæттæ кодтой сæ куыстытæ. Цы сын дзырдтон, уый-иу уайтагъд ацахстой, – загъта паддзахадон фæлварæны къамисы уæнг. – Мидфæлварæнтæ ЦИПУ-йы ратгæйæ, сæ ахуыр дарддæр уым ахæццæ кæнынц. Нæ рауагъдонтæй цалдæрæй уæлдæр профессионалон скъолатæ каст фæуыны фæстæ кусынмæ ‘рыздæхтысты сæ уарзон ахуыргæнæндонмæ æмæ сæ зонындзинæдтæ дæттынц ног фæлтæрæн. Баскаты Зæринæ каст фæцис Косыгины номыл Уæрæсейаг паддзахадон университет, Алина Галич та – Цæгат Ирыстоны паддзахадон университет. Рог промышленностæн цæттæ кæнæм хуыйæг-кæрдджытæ, бафтыд ма сыл хуыйæн дзаумæтты мастер дæр. Ацы аз сæ фыццаг рауагъд уыд, ацы азæй ма ахуыр кæнын райдайдзыстæм æндæр ног дæсныйадыл – конструктор-технологыл. Специалисттæ цæттæ кæнæм нырыккон царды домæнтæм гæсгæ: нывгæнæг модельертæ сæ куыстытæ компьютерыл сныв кæнынц, гæххæттыл кæуыл бакусынц, уыдонæн сæ хуыздæрты рахæссæм алы æмвæзады равдыстытæм. Æрæджы та архайдтам æппæтуæрæсеон конкурс «Профессионал»-ы æмæ дзы нæ рауагъдон Кристина Потапова райста йæ арæхстдзинады медальон «Дизайн модной одежды и аксессуаров». Архайдтам Оренбурджы, стæй Симферополы профессион дæсныдзинады конкурсты дæр, æмæ райстам 2-аг æмæ 3-аг бынæттæ. Уыимæ, юниорты ‘хсæн 25-æм скъолайы ахуырдзау Кристина Батанина уыд хуыздæрты ‘хсæн, – колле-джы ахуырады цыдимæ нæ зонгæ кæны йæ директор Цæгæраты Бэллæ. Афæдзы дæргъы къуыри иу хатт цæуынц скъолатæм, сæхимæ дæр сæм фæзынынц сæ фидæны абитуриенттæ, саразынц сын дæсныйады мастер-класстæ, моделированимæ æмхиц чи у, хуыйын чи уарзы, уыдон сæхи фæлтæрынц. Колледжы ис сæхи Модæты профессионалон театр, ахуыр дзы кæнынц, къамисæны раз куыд дарын хъæуы хи, уæлæдарæс равдисынæн фæлгонц куыд аразгæ у, уыдæттыл. Цыппор азы кусы колледжы, хæрз æрыгонæй æрбацыд ардæм математикæйы ахуыргæнæгæй, 2013 азæй та у йæ директор. Куыд нын радзырдта, афтæмæй ардыгæй æндæр ранмæ ацæуын ничи тырны. Йæхи дæр, зæгъы, æндæр ран нæ уыны кусгæ. Уæлдай æхсызгондзинад та йын, йæ алыварс сæ рауагъдонтæ кæй сты, уый у. Колледжы коллектив цæрынц хæларæй, кæрæдзийæн аргъ кæнгæйæ, иу бинонтау. Профессион ахуыргæнæндон акаст йæ 65 азы сæрты. Фыццаг къахдзæфтæ акодта, куыд ФЗУ-йы цур скъола, фабрикæйæн дзы цæттæ кодтой хуыйджыты, 1961 азы июлы сси Дзæуджыхъæуы 2-æм политехникон училищæ, фæстæдæр – 4-æм СПТУ, ныр та у Дзæуджыхъæуы Модæйы индустрийы колледж. «Профессионалитет» у Уæрæсейы нацпроекттæй иу, конкурсы уагыл æм бацæуынц астæуккаг профессионалон ахуырады кусæндæттæ. Куыстуæттæ