Китаймæ – уазæгуаты — 20 августа 2026 г. в 12:01:13.498
Китаймæ – уазæгуаты Дзæуджыхъæуы официалон делегаци бабæрæг кодта китайаг горæт Ганьчжоу (фарон Хæлар ахастдзинæдтæ æмæ æмгуыстады фæдыл фæндæтты тыххæй меморандум кæй сфидар кодтой, уый фæрцы балцæн фадæттæ сарæзтæуыд). Фембæлды рæстæг китайæгтæ æмæ ирыстойнæгтæ сæ къухтæ æрæвæрдтой астæуккаг скъола «Ганьчжоу» æмæ Дзæуджыхъæуы 11-æм скъолайы ‘хсæн æфсымæрон ахастдзинæдтæ сфидар кæныны тыххæй бадзырды. Дзæуджыхъæуы Сывæллæтты аивæдты æмæ Ганьчжоуйы музыкалон скъолаты ахуырдзаутæ кæй равдыстой, ирыстойнæгтæй уыцы иумæйаг концерты архайдтой Багаты Витали, Мæрзойты Соломон æмæ Бузарты Аринæ. Уымæй уæлдай, кæй байгом кодтой, уыцы равдыст «Китайско-российская палитра: художественное слияние и синтез»-ы фенæн уыд дыууæ горæты æвзонг нывгæнджыты 120 куысты. Ноджыдæр ма иу экспозици æвдыста Ирыстоны культурæ æмæ истори. Китайæгтæн равдыстой Нарты кадджытæм гæсгæ конд уацмыстæ. Фысымтæн экскурси амыдтой Сывæллæтты Тауаситы Сослæнбеджы номыл аивадон скъолайы директор Быдтаты Азæ æмæ муниципалон конкурс «Курдиатджын сывæллæттæ»-йы кæронбæттæны архайæг Александра Пахомова. Китайаг скъоладзаутæн бацамыдтой рагон ирон аивад алдымбыд, Дзæу- джыхъæуы администрацийы фæсивæдон политикæ, физикон культурæ æмæ спорты комитеты сæрдар Айларты Зауыр та æвдыста боксæй мастер-кълас. Уæ зæрдыл уын лæууын кæнæм: меморандум сфидар кæнын æмæ китайæгтимæ иумæйаг дзыллон мадзæлттæ саразын бантыст Китайимæ æмгуыстады фарстаты фæдыл Цæгат Ирыстоны Сæргълæууæджы уынаффæгæнæг Гусаты Иринæ æмæ меценат Дзебысаты Майрæмы æххуысы фæрцы. Дзæуджыхъæуы администрацийы пресс-службæ