Хьамсара мехкахой! — 18 февраля 2026 г. в 07:10:27.021
Хьамсара мехкахой! Хьатӏакхаьчар вай дукха хьийжа, дегаша сатийса беза Мархий бутт! Дуккхача хӏаман вайга уйла яйташ, дегаш сомадоахаш, Даьлацара, Цун Элчанцара Мухьаммадацара (Даьлера салам моаршал хилда Даьла Элчан) безам чӏоагӏбеш бола, ма хулла Далла тӏаверзаш бола бутт ба хьаэттар! Дуккха дикаш доаржаде, дог ийшачун дог хьаста, халача хьале волчунна гӏо де аьттув ба вай укх бетта. Хӏара ламаз, ӏибадат, дуӏаш ший тайпара, боарам боацаш лоархӏаме да укх бетта. Хьамсара йижарий, вежарий! Аз дег тӏара даькъала дувц шо укх езача ханаца! Могаш, маьрша долаш дахалда шо! Иразах, гӏозленах, Даьла раьза волча гӏулакхех дизза хилда шун вахара денош. Къахетамах хьалдузалда вай дегаш, барт, безам, йӏовхал латтийла вай фусамашка! Аллахӏа къоабал даь дӏаэцалда вай марх, ӏибадат, вай дергдола дуӏаш , дерригача къаман, республика дуккха беркат доаржадеш, дикача гӏулакхий наькъаш хьаделлаш хилба Мархий бутт! Аллахӏа къоабал болба вай Мархий бутт! Аллахӏа даькъала болба вайна Мархий бутт! Амин!