Непэ Адыгэ Республикэм и Къэралыгъо быракъ и Мафэ хэтэгъэунэфыкIы.
Непэ Адыгэ Республикэм и Къэралыгъо быракъ и Мафэ хэтэгъэунэфыкIы. Адыгеим щыпсэурэ цlыф лъэпкъ зэфэшъхьафыбэмэ ятарихъ бай ыкIи ягушхоныгъэ, тичIыгу гъэбэжъу щыпсэурэ пстэуми языкIыныгъэрэ язэкъотныгъэрэ, яунэ шIулъэгъоу фашIырэмрэ, щыIэкIэшIу илъыным пае гъэпсын Iофэу зэшIуахырэмрэ - тишъолъыр инэпэеплъ шъхьаIэхэм яз щызэхэубытагъэх. Быракъым лIэужхэр зэкъуегъэуцох, блэкIыгъэмрэ непэмрэ зэрепхых ыкIи гъэхъэгъакIэхэр ашIынхэм кIегъэгушIух. Мы ныпым зэкIэми тычIэт – зы унагъоу лIэшIэгъубэмэ къапкъырыкIыгъэ хабзэр тыфэсакъызэ къэтыухъумэу, тиатэжъ пIашъэхэм лъытэныгъэ афэтшIэу ыкIи тикъэкIощт уахътэ тикъэралыгъошхо – Урысые Федерацием – тыхэтэу дгъэпсэу. Жъогъо пшIыкIутIумрэ зэтедзэгъэ щэбзищымрэ зытет уцышъо зэикlыр адыгэ лъэпкъым къыхэкIыгъэ цlыф пэпчъми илъапI, тыдэ щэпсэуми. Атэжъ пIашъэхэм, тарихъ ЧIыгужъым, лъэпкъым ыкIи адыгэ хабзэм зэрэдунаеу ис адыгэхэр языпхырэр мы быракъыр ары. Ныбджэгъу лъапIэхэр, республикэм икъэралыгъо быракъ сыдигъокIи ти Адыгее дахэ тырерэгъэгушху, зэкъошныгъэр, зэгурыIоныгъэр, цIыфхэм язэдегъэштэныгъэр ерэгъэпытэх. Насып, псауныгъэ, щыIэкIэшIу шъуиIэнхэу, Адыгеимрэ Урысыемрэ шIуагъэ къафэзыхьыщт Iофхэу ежъугъажьэхэрэмкIэ гъэхъагъэхэр шъушIынхэу сышъуфэлъаIо!