Муус устар 11 күнүгэр төрдүс төгүлүн В.П.Карпов аатынан республиканскай дуобакка күрэхт... — 12 апреля 2026 г. в 03:36:14.292
Муус устар 11 күнүгэр төрдүс төгүлүн В.П.Карпов аатынан республиканскай дуобакка күрэхтэһии Чурапчыга ыытылынна. Күрэхтэһии биһиги оскуолабыт уонна ДЮСШ тустууга тренердэрин дуобакка тыҥааһыннаах күөн күрэстэринэн саҕаланна. Түргэн оонньууга ДЮСШ тренердэрин хамаандата кыайда. Бу күрэхтэһиигэ уһуйаан, алын сүһүөх кылаас оҕолоруттан саҕалаан аҕа саастаах спортсменнар уонна дуобаты таптыыр дьон кыттыыны ыллылар. Кыттааччылар "бүгүн дуобат бырааһынньыга" диэн үерэ кэпсэтэллэрэ истэргэ олус үчүгэй, истиҥ буолла. Кыттааччылар Чурапчыттан, Дьокуускайтан, Сунтаартан кэлбиттэр. Саамай күүтүүлээх түгэн-сеанс буолла. Манна 25 кыттааччы 3 гроссмейстери кытта тэҥинэн оонньоотулар. Вячеслав Павлович дьарыктаабыт, Сахабыт сирин дуобакка бастакы гроссмейстера Александр Гаврильевич Азаровтыын, аан дойду гроссмейстера Иван Августович Токусаровтыын уонна билигин шашечнай центр директорын, биһиги оскуолабыт биир чаҕылхай выпускницатын Рена Степановна Ноговицыналыын дуобаттаан 5 кыттааччы тэҥнэһэн анал бэлэхтэри ылан олус үөрдүлэр. Биһиги кылаастан Ваня, Уйгун, Виктор, Данил, Даниил, Арылхан гроссмейстердэри кытта сеанстаабыттара биир умнуллубат үтүө өйдебүл буолла. Кылааспыт бастыҥ үөрэнээччитэ, буруолуу сылдьар РФ спорт маастара Рожина Саша бэйэтин саастаахтарын кытта эрэ буолбакка гроссмейтердэри, тренердэри кытта оонньоон дьахталларга 2 миэстэ буолары ситистэ. Иван Токусаров "олох кыранан эрэ Сашаны кыайдым" диэн билиннэ. Карповтар дьиэ-кэргэн анал бириистэрин Сашенькаҕа туттардылар, инникитин үрдүк ситиһиилэри, гроссмейстер буолаар диэн алҕаатылар. Уолаттарбыт Ваня, Уйгун, Вова тустууктар дуобаттарын курэхтэһиитигэр куорат, Сунтаар, Чурапчы тустууктарын, тренердэрин кытта дуобаттаан бэйэлэрин тургутан көрдүлэр. Ол курдук, маннык үрдүк таһымнаах күрэхтэһиигэ Карпов аатын сүгэр этэрээт 11а үөрэнээччилэрэ ис сүрэхтэриттэн кыһаллан кытыннылар, волонтердаатылар. Вячеслав Павлович кэргэнигэр Татьяна Петровнаҕа уонна кыыһыгар Айталина Вячеславовнаҕа уонна күрэхтэһии тэрийээччилэригэр бу үтүө өйдөбүл күҥҥэ махтанабыт.