Октябрь 28-тиң хүнүнде "Мажалык" чечен чогаал каттыжыышкынының кежигүннери Тыва дыл хүн...

Октябрь 28-тиң хүнүнде "Мажалык" чечен чогаал каттыжыышкынының кежигүннери Тыва дыл хүнүн уткуштур Ак-Довурактың кадыы кызыгаарлыг, бот башкарныры берге уругларның школа-интернадының башкылары болгаш ажылдакчылары-биле ажыктыг ужуражылганы кылган. Школа-интернаттың башкылары тыва дылды канчаар кадагалап арттырып ап болурунуң дугайында оларны дүвүредип чоруур айтырыгларны хөйү-биле салган. Каттыжыышкынның даргазы Орлан Мандат-оолович Кара-Сал эге сөстү ап, ужуражылгага барган мажалыкчыларны тус-тузунда онзалап таныштырган. Ол каттыжыышкынның төөгүзүн элээн сактып, баштайгы тургускан үндезилекчи чогаалчыларны адап, чугаалаан. "Мажалык" чечен чогаал каттыжыышкынының кежигүнү, Кызыл-Мажалыкта "Чечек" уруглар садының кижизидикчи башкызы Чойганмаа Хөвең-ооловна Күжүгет тыва дылдың салым-чолу ажы-төлдүң чажындан кижизиттинер өг-бүлезинден, ада-иезинден, оларның ажы-төлү-биле быжыг харылзаазындан эгелээр дээрзин кончуг делгереңгей болгаш билдингири-биле тайылбырлаан. Каттыжыышкынның база бир кежигүнү Аржаан Ооржак элээн хөй чижектерни чугаалап, база ажылдакчыларның билип алыксаан айтырыгларынга солун харыыларны берген. Идепкейжи мажалыкчылар Дарый Ооржак, Чочагай Домбаанай, Любовь Саая тыва дылды кадагалап алырының дугайында боттарының бодалдарын илередип, тыва дыл дугайында шүлүктерни номчаан. Ужуражылга адакталып турда школа-интернаттың башкылары өөрүп четтириишкинниң бижиин мажалыкчыларга тывыскан. Ужуражылга ниитизи-биле солун болгаш чедимчелиг эрткен. Катап база мажалыкчыларны чалаарын интернаттың ажылдакчылары чугаалаан.