Тахан вай мехка дӏадоладу гӏалгӏай метта, литературан итт Ди, уж хетадаь да Халкъашта ю... — 16 февраля 2026 г. в 20:21:12.086
Тахан вай мехка дӏадоладу гӏалгӏай метта, литературан итт Ди, уж хетадаь да Халкъашта юкъерча наьна метта денна. Саькура бетта 16-ча денгара 26-ча денга кхаччалца кхетаченаш дӏахьоргья ерригача республикан доал деча даькъ тӏа, итташ эзараш дешархой чулоацаш. Белгалду, Россе къамий метташ дегӏадоаладар, уж лорадар лоархӏаме да. Вай Президента Путин Владимира могадеш да Россе къамий метта Ди тов бетта 8-ча дийнахьа дездеш хилар. Вайна наьна мотт лорабар - лоархӏаме дош да. 2025 шера 80 гаргга хьехархо балха говзал лакхъеш хилар дешара даькъ тӏарча болхлой говзал лакхъяра йолча институте. Республикан хьехархоша каст-каста дакъа лоац ерригроссийски, моттигерча яхьашка, гӏалгӏай мотт хьехаш болча хьехархоша совгӏаташ доах шоай балха лакха говзал гойташ, цунца цхьана Къилбаседа Кавказа боараме а. Керттера терко тӏайохийт таьрахьашца мотт дегӏабоалабара. 2025 шера чакхбаьлар гIалгӏай мотт «Яндекс.Переводчик» оагӏон тӏа баккхара болх. Хьакхеллаб 95 эзар дош чудоагӏаш бола цун чулоацам, цу балха дакъа лоацаш хилар 100 гаргга лакха балха говзал йола хьехархой, лингвисташ, меттаца болх беш бола нах. Хӏанз из чулоацам чакхбоалаш ба, «Яндекс» тоабагадӏакхачалехь, тоадараш деча оагӏонах. Гӏалгӏай мотт- из вай истори, культура, белгало я. Сона лоархӏаме да, берашта вай мотт ховш хилар, шоай культурах доаккхал деш уж хилар. ГIалгIай метта итт Ди - из духхьал урокаш дӏаяхьар дац, из дийна бувзам ба нахацара, хургдолчунга вугаш бола. 2026 шера оаха дӏахо дӏахьоргба болх: керда яхьашкийчъергья дешархошта, хьехархошта лаьрхӏа, литературах дешара-методически оагӏонаш, иштта хьожаргда 5-9 класса книжкаш кхыча тайпара де, дӏахо таьрахьашца проекташ дегӏайоалае, вай мотт дийна а, таханарча дено дӏадехача беса а хургболаш. Гӏалгӏай метта итт Ди дӏахьош хиларо вӏашагӏтох гӏалгӏай мотт, ший культура езараш, лораю вай къаман белгало.