Нохчийн мотт хьехаран а, ларбаран а, кхиоран а хьелашца доьзна рог1ера цхьаьнакхетар д1... — 11 апреля 2026 г. в 18:29:42.590
Нохчийн мотт хьехаран а, ларбаран а, кхиоран а хьелашца доьзна рог1ера цхьаьнакхетар д1адаьхьира Соьлжа- Г1алин хьехьархойн колледжехь оханан беттан 10-чу дийнахь. Цхьаьнакхетаран коьрта 1алашо йара Нохчийн меттан институтан куьйгалхочо Овхадов Рукъманан Мусас а, Нохчийн Пачхьалкхан университетан филологин факультетан куьйгалхочо Ирезиев Сайд-Эминан Сайд-Хьамзата а хьехархойн колледжашна лерина йазйина, арахеца кечйинчу "Нохчийн мотт" ц1е йолу 1амат йовзийтарна а, цуьнан чулацамах кхетам баларна а, хьехархойн колледжийн куьйгалхойн а, нохчийн меттан хьехархойн а цу 1аматах кхоллабелла хьежам бовзарна а лерина. Цхьаьнакхетарехь дакъалоцуш бара лераме хьеший: Нохчийн меттан институтан директор, филолгин 1илманан доктор Овхадов Рукъманан Муса, А.А. Кадыровн ц1арах йолчу Нохчийн Пачхьалкхан Университетан филологин кафедран куьйгалхо, филологин 1илманан доктор Ирезиев Сайд-Эминан Сайд-Хьамзат; Гуьмсан хьехархойн колледжана директоран хьалхара г1овс Кагерманов Сайд1алин Абу-Салахь, нохчийн меттан хьехархо Умаров 1абдулмуслиман Лом-1ела а; Нохчийн Пачхьалкхан хьехархрйн колледжан директор Асхабов Эбун Мохьмад, директоран хьалхара г1овс Басаев Мусан Ямлихан, 1илманан методически отделан хьалхара методист Махашев Вахин Зарема, нохчийн меттан хьехархой Гадаев Мунабан Зулай, Матаев Зайналладинан Емина а. Хьеший т1е а лоцуш, цхьаьнакхетарехь дакъалецира Соьлжа-Г1алин хьехархойн колледжан директора Халадов Мохьмадан Муслима, директоран хьалхарчу г1овса Шовхалова Людмила Дмитриевнас, директоран г1овса Ажиев Ибрах1иман Мадинас, иштта нохчийн а, оьрсийн, ингалсан а меттанийн а хьехархоша а, студенташа а. Хьехархойн колледжана лерина нохчийн меттан 1амат цахилар хьалххе дуьйна а тидамехь дара вайн 1илманчийн. Цу хьокъехь нийсса цхьа шо хьалха Соьлжа- Г1алин хьехархойн колледжехь хиллачу ишттачу цхьаьнакхетархь къамел а деш, и хаттар дийцаре динера, Нохчийн Республикин дешаран а, 1илманан а министран г1овсаш а цхьаьна а болуш, Овхадов Мусас а, Соьлжа-Г1алин хьехархойн колледжан директора Халадов Муслима а. Цу цхьаьнакхетарехь хиллачу жам1ийн буха т1ехь шаьш кхочушбина болх бара Муса Рукъмановича а, Сайд-Хьамзат Сайд-Эминовича а гуламан декьашхойн кхеле биллинарг. "Нохчийн мотт " ц1е йолу хьехархойн колледжана лерина х1оттийна 1амат вуно мехала хир йолуш йу нохчийн меттан хьехархошна а, студенташна а. Шен чулацам хьоле болуш, массо а меттан 1илманан дакъош йукъалоцуш йара 1амат, синтаксис йоцург. Мехала болх бара 1аматан чулацамехь декъашхойн кхеле биллинарг. Х1ора а декъах кхетам а луш, комментари а йеш, гайтира авторша шайн болх. 1амат кхоччуш йовза а, талла а хан ца хиллехь а, коьртачу декъана чулацамах кхетийра 1илманчаша. Болх, бакъдолуш,мехала бара. Цул сов, декъашхойн дуккха а долчу хаттаршна жоьпаш а луш, жоьпех кхетам а луш, вуно синк1оме д1адахара цхьаьнакхетар. Ала лаьа, нохчийн маттана сагатдеш а, и кхуьийла лууш а, и кхиош къахьоьгуш долу адамаш дуккха а хуьйлийтийла-кх Везачу ДАЛА вайн къомана йукьахь. Ткъа и 1амат х1оттош къахьегначарна ДЕЛА реза хуьлда!