ГБПОУ РС(Я) «Харбалахский образовательный комплекс им.Н.Е.Мординова - Амма Аччыгыйа»
Образование · 24 июня 2026 г.
✨🎓Бүгүн Харбалаахтааҕы үөрэхтээһин холбоһугар дьоһун-мааны күн буолан ааста. — 24 июня 2026 г. в 12:56:14.314
✨🎓Бүгүн Харбалаахтааҕы үөрэхтээһин холбоһугар дьоһун-мааны күн буолан ааста. Ол курдук, 9 уонна 11 кылааһы бүтэрбит үөрэнээччилэрбитигэр аттестат туттарар үөрүүлээх түгэн тосхойдо! Үөрэх чааһын сэбиэдиссэйэ Евдокия Ивановна Седалищева, нуучча тылын учуутала Любовь Дмитриевна Лотова тохсус кылаас үөрэнээччилэрин биирдиилээн ситиһиилэрин сырдата-сырдата сценаҕа ыҥырдылар. Холбоһук директора Любовь Аркадиевна Афанасьева уопсай орто үөрэхтээһини бүтэрбиттэринэн эҕэрдэлээн туран, аттестаттары туттарда. Онтон кылаас салайааччыта Ньургуйаана Алексеевна үөрэнээччилэрэ бары ОГЭ-ни ситиһиилээхтик туттарбыттарынан үөрэн туран эҕэрдэлээтэ. Төрөппүттэр ааттарыттан Оксана Михайловна Андреева тыл эттэ, оҕолору эҕэрдэлээтэ, учууталларга махтанна. Салгыы салайан ыытааччылар 11 кылаас үөрэнээччилэрин биирдиилээн ситиһиилэрин билиһиннэрэн туран, сценаҕа ыҥырдылар. Директор Л.А. Афанасьева туһааннаах бирикээһи ааҕан туран, үөрүүлээх быһыыга-майгыга ситии-хотуу аттестаттарын туттарда. Төрөппүттэри эҕэрдэлээн туран, махтанна. Саамай долгутуулаах түгэнинэн Айсен Бэстиинэпкэ туйгуннук үөрэммитин туоһута «Үрүҥ көмүс мэтээли» туттарыы буолла. Айсен маҥнайгы кылаастан туйгуннук үөрэнэн бүтэрдэ. Үгүс олимпиадалар кыайыылаахтара, «Харбалаах уоланнара» академическай ааҕыы бөлөҕүн көхтөөх кыттааччыта. 2026 сыл «Сыл бастыҥ үөрэнээччитэ», холбоһукка быйылгыттан олохтоммут Н.Е.Мординов-Амма Аччыгыйын аатынан стипендия хаһаайына. 11-тэр БКЭ-ни бары ситиһиилээхтик туттаран, тутуспутунан бары аттестат ылар чиэскэ тиксибиттэрэ - улахан ситиһии буолар. 4 бастыҥтан бастыҥнар ааттара оскуола «Бочуотун кинигэтигэр» киллэрилиннэ: Эмилия Федорова, Айсен Бястинов, Миша Спиридонов, Василий Трофимов. Кылаас салайааччыта Кэрэчээнэ Егоровна Терентьева оҕолорун туһугар олус долгуйбутун, кинилэринэн киэн туттарын эттэ. Төрөппүттэр итии-истиҥ тыллаах эҕэрдэлэрин оҕолоругар, учууталларга анаатылар. 📚🎓Быйылгы оскуоланы бүтэрбит оҕолорбут оскуола, нэһилиэк олоҕор куруук көхтөөхтүк кытталлар. Кинилэр бары олохторун суолун сөптөөхтүк талан, ситиһиилээх дьон буола үүнэн-сайдан истиннэр диэн баҕа санаа бастыҥын анаан, олох киэҥ аартыгар атаардыбыт! Валентина Кривошапкина, Харбалаах. @taattagazeta