БУЛЧУТ СЭҺЭНЭ
БУЛЧУТ СЭҺЭНЭ Муус устар, Айыыһыт ыйыгар Саха өрөспүүбүлүкэтин эр дьонугар үс бүк бэлиэ түгэни тосхойор. СӨ бастакы президенэ Михаил Николаев 1999 сыл олунньу 15 күнүнээҕи ыйааҕынан, муус устар ый бастакы баскыһыанньатыгар Аҕа күнүн бэлиэтиир буолбуппут. 2012 сыллаахтан, Саха Республикатын Президенин Егор Борисов Ыйааҕынан муус устар бастакы өрөбүл күнүгэр БУЛЧУТ күнэ бэлиэтэнэр. Булчут күнүн сыала: айылҕа баайын табыгастаахтык туһаныы уонна харыстааһын, эдэр булчукка айылҕаҕа сиэрдээх сыһыаны иитэргэ уонна төрүт үгэстэр умнуллубаттарын туһугар тэриллибитэ. Егор Борисов омук төрүт биир дьарыгын үйэтитэн эрэ буолбакка, саха төрүт өйдөбүлүн судаарыстыбаннас таһымыгар үйэтиппит кылааттаах. Бу иннинэ ким даҕаны, хаһан да саха итэҕэлигэр сыһыаннаах өйдөбүлү судаарыстыба таһымыгар таһааран үйэтитэ илигэ. Ил Дархан 2017 сыл олунньу 6 күнүнээҕи ыйааҕынан, муус устар ый иккис баскыһыанньата Уол оҕо күнүнэн биллэриллибитэ. Ньурбатааҕы кииннэммит бибилэтиэкэ иһинэн үлэлиир Ушканова Я. В. салайааччылаах оҕо уонна ыччат бибилэтиэкэтэ бүгүн муус устар 3 күнүгэр бу үтүө бэлиэ күннэри бэлиэтээн «БУЛЧУТ СЭҺЭНЭ» тэрээһини ыытта. Тэрээһин ыалдьыттара Ньурбатааҕы техникум студеннара, ньурба ырыаһыт быһыытынан билинэр, ылынар эр дьоно, «Кыталык» КД үлэһиттэрэ, байанайдаах булчуттар Максим Федоров – Ырыа Махсыым, Егор Михайлов уонна Ноев Р.А. салайааччылаах Ньурбатааҕы көрдүүр-быыһыыр этэрээтин байыастара. Егор Михайлов сааскы, күһүҥҥү кустааһын, Максим Федоров куобахха, киискэ туһахтааһын, муҥха, куйуур туһунан сэһэннэрин оҕолор олус сэргээн иһиттилэр, ыйытыктары биэрэн хоруйдары толору ыллылар. Салҕыы киин бибилэтиэкэни кытта сэргэ турар Ньурбатааҕы көрдүүр-быыһыыр этэрээт базатыгар тахсан быһылааҥҥа түбэстэххэ хайдах быыһанар, араас түгэннэргэ хайдах көмөлөһөр туһунан иһиттилэр, көрдүлэр, сэҥээрдилэр. Саха уус-уран литературатын төрүттээччи, бөлүһүөк, улуу киһи Өксөкүлээх Өлөксөй, 1900 сыллаахха, аан бастаан суругунан айымньыта – “Байанай алгыһыттан”саҕаламмыта. Ити даҕаны чахчы – норуоппут олоҕор Байанай суолтата сүдүтүн туоһулуур. Саха саргыта үгүс үйэлэргэ Байанайдаах буола турдун! Бултуур-алтыыр, айылҕаны кытта алтыһар саха саарыннарын Булчут күнүнэн эҕэрдэлиибит! Баай хара тыа иччитэ, Байанай тойон эһэккэ үрдүк сотолооҕуттан, түөрэҥ туйахтааҕыттан, көтөр кынаттааҕыттан, маанылаах булдуттан өрүү күндүлүү турдун! Биирдэ бэриллэр олоххо куруук сырдыгы, кэрэни эрэ түстүөххэ, саҥаны, кэскиллээҕи айыахха, баары харыстыахха, үтүөнү үксэтиэххэ! Уолаттарбыт, эр дьоммут, саха бэрдэ буолан сандаарын, киһи килбиэнэ буолан килбэйин! «Булчут сэһэнэ» тэрээһини сурукка тистэ Ньурбатааҕы киин бибилэтиэкэ ааҕааччыны кытта үлэлиир салаата.