«Арыллыы» кыбытык иис түмсүү маастардарын кытта умнуллубат көрсүһүү.
«Арыллыы» кыбытык иис түмсүү маастардарын кытта умнуллубат көрсүһүү. Бүгүн, алтынньы 13 күнүгэр, Ньурбатааҕы уопсайга олорор устудьуоннарга олус интэриэһинэй уонна ис киирбэх көрсүһүү буолан ааста. Устудьуоннар ыалдьыттарынан саха үгэс буолбут иистэниитин утумун салҕааччылар — биллэр-көстөр «Арыллыы» кыбытык иис түмсүүтүн маастардара буоллулар. Кинилэр бэйэлэрин ураты ньыманан оҥоһуллубут панноларын туһунан сиһилии сырдаттылар, устудьуоннары саха култууратын кытары чугастык билсиһиннэрдилэр. Көрсүһүүгэ паннолар автордара, худуоһунньук Аммос Прокопьевич Давыдов үлэлэрин эскииһэ, идеята хайдах төрөөбүтүн уонна хас бирдии айымньы дириҥ ис хоһоонун устудьуоннарга сырдаппыта. Кини уруһуйдарынан «Арыллыы» кыбытык иис түмсүү киһи эрэ кутун-сүрүн долгутар, дириҥ суолталаах паннолары оҥорон таһаарар. Холобур, «Оҕо кутун тартарыы», улуу Кыайыыга аналлаах ытык үлэлэр уонна да атыттар, устудьуоннар ордук интэриэһиргээтилэр. Бу айымньылар бары саха омук култууратын, үгэһин уонна олоҕун итэҕэлин кыбытык тигии нөҥүө чаҕылхайдык көрдөрөллөр. Маны таһынан, «Арыллыы» кыбытык иис түмсүү салайааччыта Галина Дмитриевна Федорова эмиэ бэйэтин дириҥ уопутун үллэһиннэ. Кини улахан айар үлэлэр олоххо хайдах киирбиттэрин, маастардар хаартыска уонна видео-материаллар көмөлөрүнэн бэйэ-бэйэлэрин кытта хайдах ситимнэһэн уустук үлэни толорбуттарын көрдөрдө. Галина Дмитриевна бу дириҥ суолталаах айар үлэ ис хаамыытын устудьуоннарга наардаан, олус интэриэһинэйдик кэпсээтэ. Устудьуоннар көрсүһүүттэн улахан таһымнаах дууһа сынньалаҥын ыллылар, саха маастардарын ураты сатабылыгар харахтарын хатаатылар уонна ыалдьыттарга барҕа махталларын тиэртилэр. Бу көрсүһүү эдэр ыччакка төрөөбүт омук кутун уонна үгэһин сыаналыырга күүстээх тирэх буолла.