Бүгүн, бэс ыйын 18 күнүгэр, күндү үтүө-мааны — 18 июня 2026 г. в 15:05:22.113
Бүгүн, бэс ыйын 18 күнүгэр, күндү үтүө-мааны учууталым, наставнигым, Саха эстрадатын төрүттээччи, Арассыыйа үтүөлээх уонна Саха сирин норуодунай артыыһа, Мэҥэ-Хаҥалас уонна Уус-Майа улуустарын ытык киһитэ Юрий Егорович Платонов төрөөбүтэ 85 сылын туолар күнэ. Юрий Егоровиһы аан-бастаан 1973 сыллаахха 9-с кылааска үөрэнэ сылдьан көрбүтүм. Биһиги нэһилиэкпитигэр эстрада артыыстара гостуруоллуу кэлбиттэрэ. Киһиэхэ хаһан да умнуллубат, үчүгэй даҕаны кэнсиэри көрдөрбүттэрэ. Мин кинилэри олох атын, киһи санаата кыайан тиийбэт кэрэ дойдутуттан кэлбит дьон курдук көрбүтүм. Ол онно, кинилэри кытта аҕыйах сылынан бииргэ улэлиэҥ, бииргэ гостуруоллуоҥ диэбиттэрэ буоллар, оннук эппит дьоннору, хаһан да олоххо киирбэти этэр, улахан фантазердар дии саныам этэ. Онно Юрий Егорович "Үчүгэй да этэ ол сайын...", "Мин күнү көрбүтүм.." диэн ырыалары ыллаабыта. Аармыйаттан кэлэн баран, үөрэх туттарса Дьокуускайга кэлбитим. Орджоникидзе болуоссатыгар "квас" иһээри уочаракка тиийбитим, арай Юрий Платоновым бу турар эбит. Бүүс-бүтүннүү джинсы көстүүмнээх, мору-муодунай. Кэлин Саха государственнай филармониятыгар улэлии киирээт даҕаны, Юрий Егоровичтыын чугастык билсэн, "Чороон" ансаамбылга улэлии сырыттахпына, кини салайар "Мелодии Севера" ансаамбыла соҕуруу Арассыыйа куораттарынан гостуруоллуу барар буолбутугар миигин конферансьенан ыҥырбыта . Ону мин нууччалыы биллэрэргэ, кэпсииргэ ыарырҕатыам диэн аккаастанан көрбүппүн, Москуба куорат биирдэ тутуллубатаҕа, барыта сатаныа, табыллыа диэн аккаастаннарбатаҕа. Онон Юрий Егоровиьы кытта Арассыыйа куораттарынан, уобаластарынан гостуруолга барсыбытым. Гостуруолга Юрий Егоровичтыын гостиницаҕа куруук бииргэ түһээччибит. Онтон ыла чугастык доҕордоспуппут. Тиийбит сирбитигэр хайаан да музейга сылдьара, онно куруук миигин илдьэ барара. Артыыс киэҥ кругозордаах буолуохтаах диэн тоһоҕолоон бэлиэтиирэ. Юрий Егорович сүбэтинэн, үөрэтиитинэн хата сүрдээҕин Арассыыйа куораттарын уонна уобаластарын көрөөччүлэрин биһирэбилин ыллар ылан испитим. Юрий Егорович онтон улаханнык ис -сүрэҕиттэн үөрэрэ, астынара. Гостиницаҕа бииргэ олорон, миэхэ саҥа нууччалыы нүөмэр бэлэмниирбит, толкуйдуурбут. Мин "Мелодии Севера" ансаамбылга үлэлиир кэммэр, Саха эстрадатын төрүттээччи Юрий Егорович Платонов улахан оскуолатын барбытым, ааспытым. Чахчы айылҕаттан бэриллибит, хас биирдии киһиэхэ бэриллибэт улахан дьоҕурдаах артыыс, педагог этэ. Кини сырдык аата эстрада тыйаатырыгар иҥэриллэн үйэлэргэ үйэтитиллибититтэн олус улаханнык үөрэбин уонна сүгүрүйэбин!Дьоһун, киһи киэнэ кэрэмэһин кытта бииргэ алтыһан, үлэлээн, доҕордоһон ааспыппынан киэҥник киэн туттабын уонна дьылҕабар улаханнык махтанабын!