Кулун тутар 13 күнүгэр, үүт туттарыыга сыһыаннаах кыһалҕалары уонна былааннары ырытар м... — 17 марта 2026 г. в 03:33:11.448

Кулун тутар 13 күнүгэр, үүт туттарыыга сыһыаннаах кыһалҕалары уонна былааннары ырытар мунньах ыытылынна. Мунньахха тыа хаһаайыстыбатын эйгэтин салайааччылара, специалистара, нэһилиэк зводтарын маастардара кыттыыны ыллылар. Мунньах кыттыылаахтара былырыыҥҥы үлэ түмүгүн сырдатан, үлэ былааннарын билиһиннэрдилэр. Сүрүн сыал быһыытынан быйылгы сылга үүт туттарааччылар ахсааннарын элбэтии соруга турда. Былырыыҥҥы сылы кытта тэҥнээтэххэ, улуус үрдүнэн сүөһү төбөтүн ахсаана аҕыйаабыта бэлиэтэннэ: былырыын 9344 сүөһү (3836 ыанар ынах), оттон быйыл 8953 сүөһү (3676 ыанар ынах) буолбут. Кэтэх хаһаайыстыбалардаахха эмиэ сүөһү төбөтүн көрдөрүүтэ аҕыйаабыта, субсидия кээмэйэ кыччаабыта бэлиэтэннэ (2025 с. 2367 сүөһү - 92,3 мөл. солк.; быйыл 1780 сүөһү – 69 мөл. солк.). Маны таһынан сорох нэһилиэктэргэ үүт собуота суоҕа, тэриллиилээх хаһаайыстыбалар аҕыйахтарыгар тыл этилиннэ. Үүт анаалыһын сыаната үрдүгүн уонна кооператив чилиэннэрэ ветеринарияҕа хайдах үүт анаалыһын туттаралларын туһунан ыйытыылар бэрилиннилэр. Үүт туттарааччылар бары "Меркурий" приложенияҕа регистрацияланан киирэллэрэ булгуччулаах. Хаһаайыстыбалар ынахтарын ахсаанын, туттарар үүттэрин кээмэйин "Меркурий" программа көрөр. Ветеринарнай справка "Меркурий" программа нонуо барарын туьунан Үөһээ Бүлүү улууһун ветеринариятын салайааччыта Мачахтыров Владимир Владимирович эттэ. Үүт туттарааччылар сылга биирдэ медосмотр ааһаллара ирдэнэр. Өрүс нөҥүө сытар дэриэбинэлэр олохтоохторо медосмотрдарын болдьоҕо ааһа илик буоллун даҕаны, суол сабыллыан иннинэ эрдэ киирэн ааһыахтарын сөбүн оройуон киинин балыыһатын бэрэстэбиитэлэ Сардана Николаевна биллэрдэ. Ханнык баҕарар күҥҥэ, графикка оҥоһуллубакка киириэххэ сөп. Быйыл үүт аһы оҥорон таһаарар саҥа тэрилтэ "ВПК" ХЭТ тэриллэн үлэтин саҕалаата. Быйылгы үүт соҕотуопкатын былаана 2101,26 тоннаҕа тэҥнэстэ. 2025 сыллаахха былаан 2700 тонна этэ, онтон 2209,88 тонна толоруллубута. Үүт ставката былырыыҥҥы курдук 85 солкуобай + 15 солкуобай (үүт аһы оҥорон таһаарааччы) = уопсайа 100 солкуобай буолар. Былырыыҥҥы курдук Алмазэргиэнбааҥҥа номинальнай счет нөҥүө үлэлиэхтэрэ. Маслоцех муус устар 1 күнүттэн үлэлииргэ бэлэмин биллэрдэ. Быйыл нэһилиэктэринэн үүт тутааһыҥҥа бэрэбиэркэлэр буолуохтара. Мунньах түмүгүнэн, тыа хаһаайыстыбатын үлэһиттэрэ быйылгы сылга үүт туттарыыга анаммыт нуорманы таһынан, быдан үрдүк көрдөрүүлэри ситиһиигэ, күүстээх дьулуурунан үлэлэһэр ытык соругу туруоруннулар.