Саха Өрөспүүбүлүкэтин Бырабыыталыстыбатын 2025 сыллааҕы үлэтин отчуоттуур сүбэ мунньах ... — 1 марта 2026 г. в 07:04:00.572

Саха Өрөспүүбүлүкэтин Бырабыыталыстыбатын 2025 сыллааҕы үлэтин отчуоттуур сүбэ мунньах Үөһээ Бүлүү нэһилиэгэр ыытылынна. Мунньаҕы СӨ Бырабыыталыстыбатын Бэрэсэдээтэлин бастакы солбуйааччыта Джулустан Анатольевич Борисов иилээн-саҕалаан ыытта. Джулустан Анатольевич мунньах саҕаланыыта наҕараадалары туттартаата. Ол курдук, Федоров Сергей Иннокентьевичка «Арассыыйа Бочуоттаах донора» бэлиэни, Кутугутов Семен Михайловичка «СӨ Доруобуйа харыстабылын Бочуоттаах бэтэрээнэ» аатын, Прокопьева Мария Николаевнаҕа «СӨ Доруобуйа харыстабылын туйгуна» бэлиэни, Меркулова Надежда Егоровнаҕа уонна Байанаева Айыына Валерьевнаҕа министиэристибэ Махтал суруктарын, Афанасьев Мариан Пудовичка СӨ Транспортын министиэристибэтин Бочуоттаах грамотатын, Михайлова Сахая Николаевнаҕа СӨ Үөрэх уонна билим министиэристибэтин махтал суругун, уонна Донской Дмитрий Дмитриевичка Арассыыйа Социальнай фондун грамотатын туттарда. Ону сэргэ Үөһээ Бүлүү нэһилиэгин баһылыга Максим Филиппович Силигиянов Үөһээ Бүлүү улууһун кураторыгар, СӨ тыраанспарын, суол-иис хаһаайыстыбатын миниистиригэр Сивцев Владимир Михайловичка «Үөһээ Бүлүү нэһилиэгин Бочуоттаах олохтооҕо» бэлиэни үөрүүлээх быһыыга-майгыга туттарда Мунньахха биир бастакыннан Тамалакаан нэһилиэгин баһылыга Иванов Петр Прокопьевич 2027 сылга культура киинин тутуутун туруоруста. Оҕолору саха тылыгар үөрэтиигэ турар ыйытыыга СӨ Үөрэҕириитин миниистирэ Нюргуна Афанасьевна Соколова былырыын ведомственнай бырайыак оҥоһуллубутун, ол курдук саха тылынан үөрэтиигэ кэтээн көрүү баарын эттэ. Ону тэҥэ, саха тылынан программалаах кинигэлэр федеральнай экспертизаны ааһан баран бэчээккэ тахсыахтара диэн быһаарда. Туобуйа уонна Үөдүгэй нэһилиэктэрин баһылыктара Лазарев Григорий Григорьевич уонна Иванов Альберт Юрьевич нэһилиэктэрин туһугар араас хайысхалаах боппуруостары көтөхтүлэр. Үөһээ Бүлүү нэһилиэгин баһылыга Максим Филиппович Силигиянов СВО кыттыылаахтарыгар бэриллэр учаастактар уота, гааһа суох туралларын, ол гааһа киирэригэр күүс-көмө буоларга туруоруста. Ону таһынан, гаас төлөбүрүн төлүүр "Сахатранснефтегаз" дьиэтэ олус ыраах турарын, онон гаас төлөбүрүн центрга ханнык эрэ дьиэҕэ көһөрөн, онно төлүүр буолалларын туоһуласта. Олохтоохтор үөрэххэ, хамнас, ЖКХ, интернет, уот тарифа, төрөөһүн, босхо эмп, нефроклиника, водопровод уо.д.а. боппуруостары көтөхтүлэр. Бу бары этиилэр протоколга киирэн, салгыы үлэҕэ ылылылыннылар. Олунньу 9-12 күннэригэр ыытыллыбыт Саха Өрөспүүбүлүкэтин ситэриилээх былааһын отчуоттуур мунньахтара улууспут бары нэһилиэктэрин таарыйан ыытылынна. Отчуоттуур 3 бөлөх 4 күн устата нэһилиэк олохтоохторун кытта илэ көрсөн үлэлэрин отчуоттаан, олохтоохтор санааларын, этиилэрин истэн, болҕомтоҕо ылан үрдүк таһымнаах мунньахтар аастылар. Отчуоттуур бөлөх салайааччытыгар, биир дойдулаахпытыгар, СӨ Бырабыыталыстыбатын Бэрэсэдээтэлин бастакы солбуйааччытыгар Джулустан Анатольевич Борисовка уонна кэлэн үлэлээбит Бырабыыталыстыба чэлиэттэригэр үтүө суобастаах, таһаарыылаах үлэҕит иһин барҕа махталбытын этэбит.