ТЫА ХАҺААЙЫСТЫБАТЫН САЙДЫЫТЫГАР УЛУУСТААҔЫ ОБЩЕСТВЕННАЙ СЭБИЭТ МУННЬАҔАР ТЫЫН БОППУРУОС... — 11 февраля 2026 г. в 03:25:56.931
ТЫА ХАҺААЙЫСТЫБАТЫН САЙДЫЫТЫГАР УЛУУСТААҔЫ ОБЩЕСТВЕННАЙ СЭБИЭТ МУННЬАҔАР ТЫЫН БОППУРУОСТАРЫ КӨТӨХТҮЛЭР Олунньу 9 күнүгэр, «Нам улууһа» МО баһылыга Юрий Слепцов бэрэссэдээтэллээх оройуоҥҥа тыа хаһаайыстыбатын сайыннарыыга Общественнай Сэбиэт мунньаҕа буолла. Нам улууһун ветеринарнай управлениетын начальнига Павел Николаев ыытыллыбыт үлэлэр туһунан иһитиннэрдэ. Кыыл-сүөл ыарыытын сэрэтиигэ чинчийэр үлэлэр түмүктэринэн, уопсайынан ыллахха, 2025 сыл ыраастык ааста диэн бэлиэтээтэ. Итиэннэ кыылы-сүөлү чиптээһиҥҥэ уонна улууска бэтэринээрдэр тиийбэттэрин боппуруоһа сытыытык турарын эттэ. Мунньах саамай сытыы тиэмэтинэн «ЭРЭЛ» ТХПК үүтү туттарааччыларга төлөбүрдэрин дьүүллэһиитэ буолла. Ол курдук эдэр биэрмэрдэр үүт туттарбыттарын төлөбүрүгэр сорҕотун тэрилтэ оҥорон таһаарбыт бородууксуйатынан, о.э. арыынан ылбыттарын сатаан батарбат кыһаҕаларын эттилэр. Маныаха тэрилтэ үүт туттарааччыларга арыыны маҕаһыыннарга атыылыыр сыананан биэрэллэрэ табыгаһа суоҕун, чэпчэтиллибит сыананан биэрэллэрэ сөптөөх буолуо этэ диэн эттилэр. Маҕаһыыннарга биир дойдулаахтарын оҥорон таһаарбыт хаачыстыбалаах олохтоох үүттэн бородууксуйата эдэр көлүөнэ үксүлэрэ билбэттэрин бэлиэтээтилэр. Ол иһин олохтоох үүт бородууксуйатын рекламалааһыҥҥа, сырдатар-тарҕатар үлэтэ күүстээхтик барара наадатын эттилэр. «Эрэл» ТХПК директора Ньургун Гуляев туруоруллубут ыйытыыларга сиһилии хоруйдаата, тирээн турар кыһалҕа суолталааҕын бигэргэттэ. Кини үөскээбит балаһыанньа үүт бородууксуйатын батарыы ыарахаттарын кытта сибээстээх диэн быһаарда. Нэһилиэнньэ ынах арыытыгар наадыйыыта лаппа аччаабыт, онон Дьокуускай куоракка уонна өрөспүүбүлүкэ атын улуустарыгар атыылаан кыһалҕаны быһаара сатыылларын эттэ. Бэлиэтээн эппитинэн, судаарыстыбыннай субсидия 77 солк., маны тэҥэ «Эрэл» ТХПК үүтү туттарааччыларга кыһыҥҥы кэмҥэ 23 солк. уонна сайыҥҥы кэмҥэ 17 солк. атыылаһар, сайылыкка туттарааччыларга 5 солк. эбии төлүүр. Дириэктэр балаһыанньаны өйдүүргэ ыҥырда уонна кооператив тэриллибит сүрүн суолтатын тоһоҕолоон бэлиэтээтэ: Кооператив - диэн ол аата кыһалҕаны, тирээн турар боппуруостары барыларын кытта бииргэ сүбэлэһэн үлэлиэхтээхпит. Күүспүтүн бары түмэн эрэ билиҥҥи ыарахаттары туоруур кыахтаахпыт. Ньургун Гуляев «Эрэл» ТХПК салалтата саҥа этиилэргэ аһаҕастарын биллэрдэ уонна кыһалҕаны быһаарыыга араас суоллары көрөллөрүн тоһоҕолоон бэлиэтээтэ. Маны сэргэ улууска сибиинньэ тиийбэтин уонна бу кыһалҕаны быһаарыы суолун боппуруоһа көтөҕүллүбүтэ. Чуолаан, оройуоҥҥа сибиинньэ иитиитин салаатын сайыннарарга анал хотону тутуу наадатын дьүүллэстилэр. Мунньах түмүгэр улуус баһылыга Юрий Слепцов нэһилиэктэр баһылыктарыгар уонна дьаһалта үлэһиттэригэр кэккэ сорудахтары биэрдэ. Ол курдук, үлэ былааныгар маннык хайысхалар киирдилэр: ⏩Нэһилиэктэр баһылыктара тыа хаһаайыстыбатын сайыннарыыга былааннарын толороллоругар күүстээх үлэни ыыталлара ирдэнэр; ⏩ «Эрэл»СХПК саҥа сыаҕы тутуутун ситиһии; ⏩ ≪Дьиэ кэргэн экономикатын сайыннарыы≫ бырагыраамматынан күүстээх үлэни ыытыы; ⏩ Сылгы, сибинньэ иитиитин сайыннарыы; ⏩ Тыа хаһаайыстыбатын управлениета билим (наука) тэрилтэлэрин кытта хардарыта сибээһи тэрийии; ⏩ Ыччаты тыа хаһаайыстыбатыгар тардыы.