"Үйэ кэрэһитэ" балаһа. — 15 июля 2026 г. в 08:40:23.406
"Үйэ кэрэһитэ" балаһа. Бүгүн от ыйын 15 күнүгэр Мэҥэ Хаҥаластааҕы нэһилиэнньэ көмүскэллээх буолуутун кэлим киинин салайааччыта Иван Шестаков Төҥүлү нэһилиэгин Бочуоттаах олохтооҕун, тыыл уонна педагогическай үлэ бэтэрээнин, сэрии сылларын оҕотун Варвара Иннокентьевна Стручкованы үбүлүөйдээх 95 сааһын туолбут күнүнэн итиитик-истиҥник эҕэрдэлээтэ. Варвара Иннокентьевна 1931 сыллаахха Доллу нэһилиэгэр күн сирин көрбүтэ. 1958 сыллаахха Дьокуускайдааҕы педагогическай үнстүтүүтү бүтэрэн, физкультура учууталынан Дьабыыл сэттэ кылаастаах оскуолатыгар үлэтин саҕалаабыта. Төҥүлүтээҕи оҕо уһуйааныгар биэнсийэҕэ тахсыар диэри иитээччинэн олус таһаарыылаахтык үлэлээбитэ. Бырагыраамалар, араас ньымалар суох кэмнэригэр айан туппут үлэтэ, үүнэр көлүөнэ доруобуйатыгар уһулуччу кылаата бүтүн өрөспүүбүлүкэҕэ билиниллибитэ. Оҕону эт-хаан өртүнэн эрчийиигэ, көрүүгэ олус үчүгэй түмүктэри биэрбитэ: ыарыы аччаабыта, иитиллээччилэр доруобуйалара бөҕөргөөбүтэ, өрөспүүбүлүкэ таһымыгар биллибитэ. Варвара Иннокентьевна - 5 оҕо күн-күбэй ийэтэ, билигин 13 сиэннээх, 27 хос тапталлаах эбэтэ. Үйэтин тухары уопсастыбаннай олоҕу өрө тутан, үлэнэн дьоллонон олорбут киһибит барыбытыгар үтүө холобур буолар. Ытыктабыллаах Варвара Иннокентьевна! Сыралаах, таһаарыылаах үлэҕэр истиҥник махтанан туран, дьолу-соргуну, өрүү чэгиэн сылдьаргар, инникитин даҕаны кэнчээри ыччаккар үүннээх-тэһииннээх үтүө тылгын иһитиннэрэ, сүбэ-ама буола тураргар баҕарабыт! Тус бэйэҕэр уонна чугас дьоҥҥор чөл туругу, этэҥҥэ буолууну, эйэлээх халлааны, бары үтүөнү! #КЦСЗН #СМФЦ #Дьоһунсаас #Үйэкэрэһитэ #Үбүлүөй95 #Төҥүлү