XX ТӨГҮЛҮН АҔАМ СААСТААХТАР СПАРТАКИАДАЛАРА ЫЫТЫЛЫННА
XX ТӨГҮЛҮН АҔАМ СААСТААХТАР СПАРТАКИАДАЛАРА ЫЫТЫЛЫННА Бүгүн улууспутугар аҕам саастаахтар декадаларын чэрчитинэн, Майа сэлиэнньэтин «Манчаары» успуорт уораҕайыгар аҕам саастаах дьоммут спартакиадалара XX төгүлүн ыытылынна. Бу тэрээһин ытык дьоммутун чэгиэн турукка, сырдык санааҕа, түмсүүлээх буолууга көҕүлээтэ, эдэр саастарын эргиттэ. Спартакиада үөрүүлээх арыллыытын парадын Мэҥэ Хаҥалас улууһун «Урожай» физкультурнай-спортивнай уопсастыбатын бэрэссэдээтэлэ, СӨ физическэй култуураҕа уонна успуорка туйгуна Виталий Пестряков салайан киллэрдэ. Бүгүҥҥү үөрүүлээх тэрээһиҥҥэ Мэҥэ Хаҥалас улууһун баһылыга Дмитрий Тихонов, Майа олохтоох дьаһалтатын баһылыгын солбуйааччыта Дмитрий Игнатьев, нэһилиэнньэ көмүскэллээх буолуутун биир кэлим киинин салайааччытын солбуйааччы Мария Федорова, социальнай бэлиитикэ салалтатын салайааччыта Октябрина Кулешова, бэтэрээннэр сэбиэттэрин бэрэссэдээтэлэ Евдокия Решетникова, Мэҥэ Хаҥалас улууһун бочуоттаах олохтооҕо, СӨ ытык кырдьаҕаһа, ытык ыала, бэтэрээннэр спартакиадаларын 87 саастаах көхтөөх кыттыылааҕа Дмитрий Сыромятников, спартакиада кылаабынай судьуйата Дмитрий Сидоров эҕэрдэ истиҥ тылларын анаатылар, бүгүҥҥү күҥҥэ ситиһиилэри, кыайыыга дьулууру баҕара хааллылар. XX үбүлүөйдээх спартакиадаҕа 28 хамаанда 8 көрүҥҥэ күөн көрүстүлэр: сүүрүү, теннис, буулдьанан ытыы, хабылык-хаамыска, мохсуо, дуобат, саахымат уонна дартс. Кытаанах киирсии кэнниттэн, кыайыылаахтар ааттара билиннэ: Бастакы бөлөххө: 🥇 1 миэстэ — Майа сэлиэнньэтэ; 🥈 2 миэстэ — Төҥүлү нэһилиэгэ; 🥉 3 миэстэ — Нөөрүктээйи нэһилиэгэ. Иккис бөлөххө: 🥇 1 миэстэ — Дьабыыл нэһилиэгэ; 🥈 2 миэстэ — 1 Баатара нэһилиэгэ; 🥉 3 миэстэ — Хорообут нэһилиэгэ. Үһүс бөлөххө: 🥇 1 миэстэ — 3 Мэлдьэхси нэһилиэгэ 🥈 2 миэстэ — Мэлдьэхси нэһилиэгэ 🥉 3 миэстэ — Догдоҥо нэһилиэгэ. Кыайыылаах хамаандалары итиитик-истиҥник эҕэрдэлиибит! Тэрээһин үрдүк таһымнаахтык ааһан, кыттааччылар даҕаны, көрөөччүлэр даҕаны дуоһуйууну, үөрүүнү ылан тарҕастылар. Бу курдук олоххо көхтөөх, эдэрдии эрчимнээх буолуҥ диэн алгыспытын аныыбыт! Мэҥэ Хаҥалас улууһун дьаһалтатын пресс-сулууспата