«Үрүҥ торуоска» аахсыйа саҕаланна
«Үрүҥ торуоска» аахсыйа саҕаланна 👨🦯 Аан дойдутааҕы «Үрүҥ торуоска» күнүн чэрчитинэн улуустааҕы көрбөттөр уопсастыбаларыгар ый устата ыытыллар аахсыйа саҕаланна. Үтүө үгэс буолбут тэрээһини уопсастыба чилиэннэрэ И.М.Сосин аатынан оройуоннааҕы киин бибилэтиэкэҕэ көрүстүлэр. 🧑🦯 Тэрээһин кыттыылаахтарын көрбөттөр улуустааҕы уопсастыбаларын бэрэссэдээтэлэ Иван Семенов, нэһилиэнньэ социальнай көмүскэллээх буолууга кэлим киинин салайааччытын солбуйааччы Мария Федорова эҕэрдэлээтилэр, уопсастыба көхтөөх кыттыылаахтарыгар наҕараадалары туттардылар. 👩🦯 Сыл устата ыытыллыбыт үлэ түмүктэрин, туох ыарахаттар баалларын уонна инники соруктары ырыттылар. Арассыыйа, өрөспүүбүлүкэ таһымнаах күрэхтэһиилэргэ хамаанданан, биирдиилээн ситиспит кыайыыларын бэлиэтээтилэр. 🎸 Салгыы Арассыыйаҕа ыытыллар хараҕынан мөлтөхтүк көрөр дьон интеллектуальнай оонньууларын көрүҥнэрин, быраабылаларын үөрэтии буолла. Түмсүү күнүн ырыа куонкурустарын кыайыылаахтара – Арассыыйаҕа ыытыллыбыт «Душа народная» Роман Винокуров, улууска Николай Потапов айар дьоҕурдарынан киэргэттилэр. 💬 Иван Семенов, көрбөттөр улуустааҕы уопсастыбаларын бэрэссэдээтэлэ: – «Үрүҥ торуоска» аахсыйа арыллыытыгар остуол оонньууларын тэрийдибит. Бу ыйга биһигини элбэх үлэ, тэрээһин күүтэр: Аллараа Бэстээххэ «Парус» успуорт уораҕайыгар Илин эҥэрдээҕи волейбол, Майаҕа оҕо-ыччат успуорт оскуолатыгар улуустааҕы «ШОУдаун» остуол тенниһэ, уопсастыбаны өрүү өйүүр киин бибилэтиэкэ дьиэтигэр биктэриинэ, Светлана Дмитриевна Иванова-Намыына айар киэһэтин, о.д.а. тэрээһиннэри оҥоруохпут. Уопсастыбам бары чилиэннэригэр, бары тэрээһиннэр, күрэхтэһиилэр көхтөөх кыттааччыларыгар кытаанах доруобуйаны, ситиһиилэри баҕарабын. @gazetaerkeii @ulusmedia