ГОСПАБЛИК МБОУ "Чурапчинская гимназия им. С. К. Макарова"
Образование · 1 сентября 2026 г.
Бүгүн Билии күнэ! — 1 сентября 2026 г. в 07:46:50.764
Бүгүн Билии күнэ! Маҥнайгы чуораан чугдаарар күүтүүлээх күнүн С.К. Макаров аатынан Чурапчы гимназията үрдүк таһымнаахтык бэлиэтээтэ. Бэлиэтээн эттэххэ, биһиги оскуолабыт 32-с алтан чуораана чугдаарда. Үөрүүлээх линейкаҕа ыалдьыттар, учууталлар, гимназистар дохсун ытыс тыаһынан 5 кылаас оҕолорун көрүстүбүт. 5 "а" кылаас салайааччытынан Зоя Николаевна Сивцева, саха тылын уонна литературатын учуутала, буолла, оттон 5 "б" кылааска Николай Николаевич Романов, физкультура учуутала, салайааччы буолла. Бүгүҥҥү үөрүүлээх күнүнэн гимназия директора Юрий Михайлович Слепцов, Чурапчы улууһун үөрэҕин салалтатын начальнига Юрий Павлович Посельскай эҕэрдэлээтилэр. Өр сылларга гимназияҕа үлэлээбит бэтэрээн учууталлар эҕэрдэ тыллара барыбытын долгутта. Кинилэр ааттарыттан эҕэрдэ тылы Чурапчы гимназиятын төрүттээччитэ уонна бастакы дириэктэрэ, РСФСР норуот үөрэҕириитин туйгуна, Саха Өрөспүүбүлүкэтин үөрэҕириитин бочуоттаах үлэһитэ, Академик Владимир Петрович Ларионов аатынан пуонда лауреата, Чурапчы улууһун уонна Чурапы нэһилиэгэн бочуоттаах олохтооҕо Альбина Степановна Иустиноваттан эттэ. Оҕолор ааттарыттан гимназия президенэ, XI кылаас үөрэнээччитэ Анна Лазарева учууталларыгар, үөрэнээччилэргэ истиҥ тыллардаах эҕэрдэ тылын анаата. Салгыы гимназиябыт активист оҕолоро үҥкүүлэрин бэлэхтээтилэр. Кинилэр үөрэххэ, үүнүүгэ-сайдыыга дьулуһуу бэлиэтин – кумааҕы сөмөлүөттэри саҥа V кылаастарга туттардылар. Бүгүҥҥү дьоро күҥҥэ биир кэлим эксээмэҥҥэ үрдүк бааллары ылбыт оҕолор учууталларын чиэстээтилэр. Ол курдук, былырыыҥҥы үөрэх сыла туйгуннук түмүктэнэн, 11 кылаас үөрэнээччилэрэ биир кэлим эксээмэннэригэр 100 баалы ыланнар өрөспүүбүлүкэ үрдүнэн бастыҥнарынан ааттаммыттара. Вика Захарова саха тылыгар, учуутала Фекла Николаевна Болдовская, Ньургуйаана Егорова нуучча литературатыгар, учуутала Александра Апрельевна Болдовская, Айсана Сивцева нуучча тылыгар, учуутала Лена Романовна Семенова, биир кэлим эксээмэҥҥэ 100 баалы ылары ситиспиттэрэ. 2025-2026 үөрэх дьылыгар биһиги гимназиябыт тыа сирин бастыҥ оскуолатынан ааттаммыта. Онон быйылгы үөрэх дьыла эмиэ үгүс кыайыылаах-хотуулах, ситиһиилээх буолуо диэн бука бары кэтэһэбит. Саҥа үөрэх дьыла саҕаламмытынан гимназиябыт аатыттан бутуг Саха сирин учууталларын, үөрэнээччилэрин, төрөппүттэрин, барыларын итиитик-истиҥник эҕэрдэлиибит! Саҥа сылга барыта табылыннын, ситиһиилэр кэлэн истиннэр, барыта этэҥҥэ буоллун. Өссө төгүл эҕэрдэ!👏🏻👏🏻👏🏻☺️💫 https://vk.ru/album-217282117_310644493 Билии күнүн хаартыскалара🎉🎊София Гоголева, Валерия Степанова хаартыскаҕа түһэриитэ, X кылаас, «Тумус кыһа» медиа-киин, С.К. Макаров аатынан Чурапчы гимназията