Айыы Кыһата — саха тылын, сиэрин-туомун уонна оҕо сайдыытын биир ситимҥэ холбуур кыһа.
Айыы Кыһата — саха тылын, сиэрин-туомун уонна оҕо сайдыытын биир ситимҥэ холбуур кыһа. Бу гимназия саха төрүт өйүгэр, үгэһигэр уонна иитиигэ олоҕуран, хас биирдии учуутал, үөрэнээччи уонна төрөппүт бэйэтин сайыннарарга, алтыһарга уонна ыйдар өйдөбүллэринэн дьарыгын тэрийэргэ дьулуһар. Ол курдук, алтынньы ый — бэйэ дьарыгын сөпкө тэрийии ыйыгар, «Айыы Кыһата» национальнай гимназияҕа улахан сүбэ мунньах ыытылынна. Мунньах сүрүн кыттыылаахтарынан төрөппүт кэмитиэтин ийэ, аҕа, эбээ сүбэлэрин бэрэссэдээтэллэрэ, попечительскай уонна управляющай сэбиэт чилиэннэрэ, общественность буоллулар. Үөрэх тэрилтэтин өйүүр, бииргэ үлэлэһэр, оскуола сайдыытыгар тэҥҥэ кыттыһар дьон мустан сүбэлэрин-амаларын, санааларын эттилэр, этиилэрин киллэрдилэр. Гимназия дириэктэрэ Лидия Петровна Шамаева сүбэ мунньах сыалын-соругун билиһиннэрдэ уонна оскуола инники сайдыытын тосхоллорун кэпсээтэ. Оскуола сэһэнигэр олоҕуран иитии уонна үөрэтии үлэ ситимнээҕин ыйдарынан аттаран, Анатолий Павлов-Дабыл үөрэҕинэн үлэ ыытылларын сырдатта. Ону тэҥэ бу үөрэх дьылыгар оскуола–үөрэнээччи–төрөппүт үс өрүттээх сөбүлэҥ түһэрсиллэн, үлэ саҕаламмытын бэлиэтээтэ. Ыҥырыылаах ыалдьыттарга учууталлар, төрөппүт кэмитиэтин бэрэссэдээтэлэ, гимназия сэһэнинэн «Удьуор утуму» салҕыыр, оҕо сатабылын арыйар араас хайысхалаах бырайыактарын сырдаттылар. Москубаҕа «Золотая осень» куонкурска ситиһиилэнэн кэлбит «Айыы утах», «Отонноох тыква» барыанньалар, тума үлэлэр, саха төрүт иһитин-хомуоһун оҥоруу, аҕа түмсүүтэ — булт-алт эйгэтигэр уонна «Күбэйэ» үҥкүү ансамбыла оҕону кытта алтыһыыга, иис-уус уонна бэйэни көрүнүү маастар-кылаастары тэрийии, «Уран» дьарык — оҕолорго сатабылы иҥэрэр сыалтан «Ураһаҕа-Кут уйатыгар» кыыс хаппахчытын эбээ түмсүүтүн кытта саҕалааһын, оҕо эт-хаан өттүнэн сайдарыгар эрчиллэр, дьарыктанар эйгэни тэрийии, биир тэҥ быһыылаах форма, медиастудия сайдыытыгар араас үлэ ыытылларын кэпсээтилэр. Онон тустаах этиллибит этиилэр, сүбэлэр-амалар салгыы сайдарга тирэх буолуохтарын эрэннэрдилэр. Тэрээһин түмүгүнэн, Ил Тумэн дьокутаата Ньургуйаана Заморщикова, Дьокуускай куорат Думатын дьокутаата Владимир Ю, урбаанньыт Ирина Матвеева, Виталий Слепцов аҕа сүбэтин бэрэссэдээтэлэ, попечителлэр Алексей Кузьмин уонна Атласовтар дьиэ кэргэн санааларын этэн, көмө түмсүүтүн тэрийэргэ быһаарыннылар. Оскуола сэһэнигэр олоҕурар үлэлэри өйөөн, спонсордары көрдүүргэ этии киллэрдилэр. Бу мунньах — саха оҕотун төрүт тыыннаах, үтүө үгэстээх, инникигэ эрэллээх гына иитии суолугар биир улахан хардыы буолла.