Государственное Собрание (Ил Тумэн) Республики Саха (Якутия)
Политика · 11 июня 2026 г.
Алексей Еремеев Арассыыйа күнүнэн эҕэрдэтэ — 11 июня 2026 г. в 22:31:00.174
Алексей Еремеев Арассыыйа күнүнэн эҕэрдэтэ Күндү Сахам сирин дьоно-сэргэтэ! Эhигини Саха Өрөспүүбүлүкэтин Ил Түмэнин уонна тус бэйэм ааппыттан дойдубут биир бэлиэ судаарыстыбаннай бырааhынньыгынан ‑ Арассыыйа күнүнэн истиҥник эҕэрдэлиибин! 1990 сыл бэс ыйын 12 күнүгэр РСФСР норуоттарын дьокутааттарын I сийиэhигэр Арассыыйа Федерациятын судаарыстыбаннай суверенитетын туhунан Декларация ылыныллыбыта. 1992 сылтан бэс ыйын 12 күнүгэр судаарыстыбаннай суверенитет туhунан Декларация ылыныллыбыт күнэ бэлиэтэнэр буолбута, онтон 2002 сыллаахха Арассыыйа күнэ олохтоммута. Бу күн өрө көтөҕүллэн уонна махтанан туран биhиги улуу дойдубут олорон кэлбит устуоруйатын эргиллэн көрөбүт, саҥа ситиhиилэри бэлиэтиибит. Арассыыйа киэҥ сиргэ танаан сытарынан, сиртэн хостонор туhалаах баайынан биллэр, ол эрээри дойдубут сүрүн баайа – хорсун санаалаах, инникигэ дьулуурдаах, араас эйгэҕэ үлэлиир – хамсыыр дьоно ‑ сэргэтэ. Ол курдук, биhиги литэрэтиирэбит уонна ускуустубабыт чулуу айымньыларынан, билим эйгэтигэр, бырамыысылыннаска үрдүк ситиhиилэрбитинэн, аныгы технологиялары хото киллэрэрбитинэн киэн туттабыт. Билигин Арассыыйа тутулуга суох буолуу хайысхатын бөҕөргөтөн, экэниэмикэтин сайыннаран, дьон олоҕун – дьаhаҕын тупсарар улахан национальнай бырайыактары олоххо киллэрэн иннин хоту дьүккүөрдээхтик баран иhэр. Арассыыйа норуоттарын сомоҕолоһууларын сылын үөрүүлээх быһыыга-майгыга арыйар тэрээhиҥҥэ Бэрэсидьиэн Владимир Путин биhиги дойдубут элбэх омук олорор судаарыстыбатын быhыытынан үөскээбитин уонна үйэлэр тухары олохтоох норуоттар култуураларыгар, үгэстэригэр дириҥ ытыктабылы сүрүн бириинсип оҥостон кэлбитин тоhоҕолоон бэлиэтээбитэ. Ол өбүгэлэрбититтэн утумнаабыт өйдөhүүбүт – өйөhүүбүт, сомоҕолоhуубут бүгүҥҥү күҥҥэ улахан суолталаахтар, ыарахан кэмҥэ тирэх буолаллар. Өрөспүүбүлүкэбит ‑ Арассыйа биир саамай бөдөҥ уонна стратегическай суолталаах эрэгийиэнэ – култууралар алтыhыыларын холобура буолар. Биhиги ураты кэрэ айылҕалаах хотугу кыраайбытыгар үгүс омук иллээхтик олорор, өбүгэлэрин ураты тыыннарын, үгэстэрин илдьэ сылдьар. Бэйэ-бэйэҕэ ытыктабыл, төрүппүтүгэр – ууспутугар харыстабыллаах сыһыан өрөспүүбүлүкэбит дьонун ‑ сэргэтин түмэр, үлэҕэ –үөрэххэ кынаттыыр. Күндү доҕоттор! Бу бэлиэ күҥҥэ барыгытыгар кытаанах доруобуйаны, чөл туругу, этэҥҥэ буолууну, эйэни, үтүөнү баҕарабын! Дойдубут сайдарын туhугар бары бииргэ үлэлиэххэ-хамсыахха! Саха Өрөспүүбүлүкэтин Ил Түмэнин Бэрэссэдээтэлэ А. И. Еремеев