Государственное Собрание (Ил Тумэн) Республики Саха (Якутия)
Политика · 17 октября 2026 г.
Андрей Находкин: «Үтүө санаанан, махталынан эрэ олоруохха»
Андрей Находкин: «Үтүө санаанан, махталынан эрэ олоруохха» 5️⃣5️⃣🌿 Бу күннэргэ биир дойдулаахпыт, СӨ Ил Түмэнин Сир сыһыаннаһыыларыгар, айылҕа ресурсаларыгар уонна экологияҕа сис кэмитиэтин бэрэссэдээтэлэ Андрей Находкин олоҕун дьоһун-мааны кэрдиис кэмин ‒ 55 сааһын туолла. Бу бэлиэ түгэнинэн кинини кытары көрсөн, атах тэпсэн олорон, олоҕун кэрдиис кэмнэрин сэгэтэн кэпсээбититтэн ааҕааччыларбытыгар билиһиннэрэбит. ‒ Андрей Михайлович, бастатан туран, аҕыйах хонуктааҕыта үбүлүөйдээх төрөөбүт күҥҥүн бэлиэтээбиккинэн эйэҕэс эҕэрдэ буолуохтун! ‒ Махтал! Күн сирин көрбүппэр төрөппүттэрбэр махтанабын. Аҕам ‒ Михаил Николаевич, М.Горькай аатынан сопхуос Маттатааҕы отделениетын оробуочайа, ийэм ‒Анна Семеновна, учуутал, завуч этилэр. Аҕам, хомойуох иһин, эдэр сааһыгар сылдьан мин тоҕус саастаахпар ууга былдьаммыта. Дьиэ кэргэҥҥэ соҕотох оҕо буоламмын, ийэ тапталын билэ улааппытым. Кырабыттан мэлдьи ийэбин батыһан, кинини холобур оҥостубутум. Оҕо сааһым үтүө кэмнэрэ дойдубар Маттаҕа, ийэм дойдутугар Сыымахха ааспыттара. Доҕотторум, аймахтарым бары онно бааллар. Билигин тиийдэхпинэ, бэйэбин оҕо курдук сананабын. Бары кууһа, сыллыы, алгыы сылдьаллар. Миэхэ онтон ордук күндү туох баар буолуой?! Түгэнинэн туһанан, Учуутал күнүнэн итии-истиҥ тыллары учууталларбар аныыбын. Маттаҕа үөрэппит тапталлаах учууталбын, кылааһым салайааччытын Марфа Дмитриевна Попованы кытта билигин да сибээспитин быспаппыт. Маттаҕа, Майаҕа үөрэппит, такайбыт, сүрэхтэрин сылааһын бэрсибит, киһи оҥорбут үгүс элбэх учууталларбын ытыктабылынан ахтабын, кими да умнубаппын. ‒ Иккис эҕэрдэбит ‒ үрдүкү судаарыстыбаннай наҕараадаҕынан! Өрөспүүбүлүкэ социальнай-экэнэмиичэскэй сайдыытыгар үтүөлэриҥ, өр сыллаах үтүө суобастаах үлэҥ үрдүктүк сыаналанан СӨ Ил Дарханын бу дьыл балаҕан ыйын 24 күнүнээҕи уурааҕынан эйиэхэ «СӨ норуотун хаһаайыстыбатын үтүөлээх үлэһитэ» аата иҥэрилиннэ. ‒ Махтанабын. Хас да сыллааҕыта «Мөҥүрүөн нэһилиэгин Бочуоттаах олохтооҕо» буолбуппунан киэн туттабын. Олох эдэр сааспар, 18-таахпар, үлэһит буолбутум, онон ыстааһым 37 сыл. Ити сыллар тухары наар улууспун кытта ситимнээх үлэлээн-хамсаан кэллим. Ол иһигэр, 1996 сылтан эппиэттээх, салайар үлэҕэ сылдьыбытым лоп курдук 30 сыл буолбут эбит. Нэһилиэк дьокутаатыттан саҕалаан, дьонум-сэргэм итэҕэлин ылан, уопсайа биэс төгүл быыбарданным. Биир дойдулаахтарбар итэҕэллэрин сүктэрэн талбыттарыгар махталым улахан. Биллэн турар, олох барыта остуоруйа курдук үүт-тураан буолбат, онно барытыгар өйүүр, өйдүүр, күүспэр күүс эбэр, тирэх буолар олоҕум аргыһыгар ‒ кэргэммэр Федора Григорьевнаҕа махталым муҥура суох. ‒ Эн төрөөбүт улуускуттан харыс да сири халбарыйбакка үлэлээн кэллиҥ. Бэдьимэҕэ учууталынан, Баатараҕа дириэктэри үөрэх чааһыгар солбуйааччынан, кэлин Мэлдьэхси, Павловскай оскуолаларын дириэктэринэн үлэлээбитиҥ. Тус бэйэм эйигин Владимир Птицын улуус баһылыгынан үлэлиир кэмигэр баһылыгы социальнай боппуруостарга солбуйааччынан үлэлии кэлиэххиттэн алтыһан билэбин. ‒ Оннук. 2003 сыллаахтан, улуус баһылыгын социальнай боппуруостарга солбуйааччынан кэлиэхпиттэн хайыы үйэҕэ 23 сыл ааһа охсубут, үһүс баһылыкпын кытта үлэлии сылдьабын. Онтон ити кэм тухары хас салайааччыны, дьокутааты, нэһилиэк баһылыктарын кытта үлэлээбиппин, алтыспыппын ааҕан сиппэппин. Онон, ойоҕоһуттан көрөөччү, кириитикэлээччи буолбакка, бу кэнники 23 сыл устата улууспутугар ыытыллар үлэҕэ-хамнаска, сайдыыга быһаччы дьоммун-сэргэбин кытта үлэлэһэн кэллим, инникитин үлэлиэм даҕаны турдаҕа. Сиһилии ⬅️ @gazetaerkeii @ulusmedia