🌞Кэрэ айылҕалаах,
🌞Кэрэ айылҕалаах, үтүө дьонноох Алаһыайга Алаһыай нэһилиэгэ, Аллараа Халыманы кытта кыраныыссалаһа сытар, региональнай суол таарыйар, сайдыылаах нэһилиэктэрбититтэн биирдэстэринэн буолар. Нэһилиэккэ, салалтаҕа дьоҕурдаах удьуор аймах дьон уоллара Николай Николаевич Кондаков баһылыгынан олорор. Олохтоох дьаһалта, бэйэлэрин идэлэрин биэс тарбах курдук билэр уопуттаах исписэлиистэринэн, баһылыгы солбуйааччы Александра Пахомова, исписэлиистэр Вадим Винокуров, Дьулустан Федоров, тыа хаһаайыстыбатын исписэлииһэ Евдокия Кондакова, саҥа үлэһит Вероника Оконешникова дьаһалларынан салайтаран үлэлии-хамсыы, сайдыыны салайса олорор. Баһылык сонуна сэргэх, былаана киэҥ. ⚜️Олох-дьаһах Нэһилиэккэ быһа холоон 389 киһи олорор. Ытыктанар тыыл бэтэрээннэрэ Александра Даниловна Третьякова, Екатерина Дмитриевна Кокорина, Матрена Константиновна Кокорина оҕолорун, чугас дьонун тапталларыгар убанан этэҥҥэ олороллор. Алаһыайтан төрүттээх анал байыаннай дьайыыга 21 байыас кытта сылдьар. Быйыл сайын уулаах дьылбуолбут, ол курдук уу таһыма от ыйын 22 күнүнээҕи көрдөрүүтүнэн 705 с. кирбиигэ (777 кутталлаах таһым) тиийэ сылдьыбыт. Билигин кыралаан түһэр. Сайыҥҥы өттүгэр социальнай суолталаах эбийиэктэргэ, былаһааккаларга бэйэ күүһүнэн дьоҕус өрөмүөннэр тэриллэн, саҥардыллан, үөрэх дьылын, кыстыгы бэлэм көрүстүлэр. Итиини, уоту биэрэр тутаах тэрилтэлэр үлэлии тураллар, уматыгынан хааччыллыы, кыһыҥҥы суол туруор диэри баар. Быһайын, олохтоох ОДьКХ маастара Анатолий Винокуров дьаһалынан, хачыгаар үлэтин чэпчэтэр, бэйэ ньыматынан чоҕу киллэрэр Пандус оҥоһуллубут. Биир тутаах үлэнэн, хочуолунай улахан турбата өрөмүөннэнэн саҥардыллыбыт. Саҥа турба кэлэригэр түөрт сыбаайа түһэриллэн бэлэмнэммит. Бөртөлүөт түһэр былаһааккатын сирэ көннөһүллүбүт. Итиэннэ баһаарынай балаһа сөргүтүллүбүт. АДПИ тэрил дьиэ аайы 100% холбоммут. Бу сыл үбүлээһинэ быһаарылыннаҕына балыыһа икки хоһо өрөмүөннэниэхтээх, инникитигэр саҥа эбийиэк тутуллара былааннанар. Бу күн биэлсэр миэстэтигэр аһаҕас вакансия биллэһиллэн турар. Нэһилиэги сэттэ маҕаһыын аһынан-таҥаһынан хааччыйан, олоҕу-дьаһаҕы тутан олороллор уонна бары тэрээһиннэр көҕүлээччилэринэн, успуонсардарынан буолаллар диэн баһылык урбаанньыттарын махтана бэлиэтиир. Икки эдэр ыал дьиэ туттар, онон олохсуйуу баар, инники олох кэскиллэнэр. ⚜️Үөрэхтээһин В.А.Местников аатын сүгэр Алаһыай орто оскуолата үөрэх дьылын 54 үөрэнээччилээх көрсүбүт. Быйылгы выпускниктартан 2 оҕо орто анал үөрэххэ киирбит. Маны сэргэ 9 кылаас кэннэ икки үөрэнээччи устудьуон үрдүк аатын сүкпүт. Быйыл оскуола боруогун 11 оҕо атыыллаабыт. «Чуораанчык» уһуйааҥҥа 23 кырачаан иитиллэр. ⚜️Тыа хаһаайыстыбата Оттуур ходуһалар кууран-хатан, сорох өттүн уу ылан быйыл от, отон үүнүүтэ мөлтөҕүнэн бэлиэтэммит. Быйыл 210 туонна от оттонон, былаан 64% эрэ буолбут. Онон 65 туонна, ыаллыы сытар Өлөөкө Күөл бөһүөлэгин сылгы Собуотуттан сайаапкалыыр былаан баар. 8 ыал ынах сүөһүнэн кэтэх хаһаайыстыбалаах. Нэһилиэккэ уопсайа хороҕор муостаах ахсаана-57, мантан 26 ыанньык. Сылгы 169, бу көрдөрүүттэн биэтэ- 97. ⚜️Уопсастыба «Саһарҕа», «Кэнчээри», «Кэскил» түөлбэлэр, Арчы дьиэтэ, салайааччы А.Н. Носова, «Ситим» бэтэрээннэр сэбиэттэрин түмсүүлэрэ, (бэрэссэдээтэл Татьяна Иннокентьевна Созонова), “Дьулуур” эдэр ыччат түмсүүтэ (бэрэссэдээтэл Любовь Александровна Третьякова), “Тэтим” орто саастаахтар түмсүүлэрэ, (бэрэссэдээтэл Марианна Сергеевна Шадрина), нэһилиэк кэрэ аҥардарын түмсүүтэ (бэрэссэдээтэл Мария Ивановна Явловская), итиэннэ уопсастыбаннай хамсааһыннар тыа сирин сайдыытыгар төһүү күүс буолаллар. «Сарыал» култуура киинин дириэктэригэр аһаҕас бакаансыйа баар. Быйыл Алаһыайтан төрүттээх өрөспүүбүлүкэтээҕи «Дыгын оонньуулара» үһүс төгүл кыттыылааҕар, Алаһыай нэһилиэгин бочуоттаах олохтооҕор Алексей Соҕоновка олохтоох дьаһалта аатыттан көмө уонна наҕараада туттарыллыбыта.