ӨЛӨӨН ТУЙГУН ЫАЛА – СЕМЕНОВТАР
ӨЛӨӨН ТУЙГУН ЫАЛА – СЕМЕНОВТАР Элбэх оҕолоох ыал Семеновтары кытта билистим. Кинилэр Өлөөн биир биллэр-көстөр туруу үлэһит сэмэй дьоно. Түөрт оҕо амарах ийэлээх аҕа ыраах тыйыс сиргэ бур-буруо таһаарынан олороллор. Владислав Васильевич «Илкэт» культура киинигэр сектор сэбиэдиссэйинэн таһаарыылаахтык үлэлиир. Олохтоох уол улахан общественник – нэһилиэк депутаттарын сэбиэтигэр бэрэссэдээтэл. Ону таһынан элбэх сыл улуус Мас тардыһыытын федерациятын салайар, бэйэтэ спортка чугас, ситиһиилэрдээх. Кэргэнэ Оксана Дмитриевна улуус киин балыыһатын стоматолог бырааһа. Өссө 2006 сыллаахха распределениеннан, үөрэҕин бүтэрээт, Өлөөҥҥө кэлэн, Бүлүү кийиитэ олохсуйбут. Ыал улахан кыыһа Надежда Дьокуускайдааҕы авиационнай колледж устудьуона, иккис кыыстара Лиана быйыл 11 кылааска таҕыспыт, Лаврентий 7-с кылаас үөрэнээччитэ, кыралара Үрэн түөрт саастаах. Ыал оҕолорун көхтөөх гына, төрүт дьарыктарынан, спортунан иитэр. Аҕалара оҕолорун бултка, балыкка куруук илдьэ сылдьар, сыһыарар, үлэни өрө тутара кэрэхсэбиллээх. Семеновтар субсидияланар сөмөлүөт квотата элбиирин баҕараллар. Көрүллэр квота эрдэ бүтэн олохтоох дьону эрэйдиирин биллэрдилэр. Ити сөптөөх туруорсуу. Билигин кэлии-барыы үксээтэ, оннук сырыы биһиги республикабыт кытыы сытар улуустара хайаан да оннук кыаҕы туһаналлара ирдэнэр. Бу соторутааҕыта “Биир ньыгыл Арассыыйа” баартыйа съеһыгар ылыллыбыт “Народнай программатыгар” Сибиир уонна Уһук Илин регионнарыгар сөмөлүөтүнэн көтүүгэ льготнай билеттары атыылыыры салҕыырын уонна аэропортары тупсарыы киирдилэр. Онон хайаан да ити боппуруоска үлэ барыаҕа. Өр сылларга бэриниилээхтик уонна таһаарыылаахтык үлэлээбиттэрин иһин Владислав – Саха республикатын культура, онтон Оксана доруобуйа харыстабылын туйгуннара. Бу курдук интэриэһинэйдик «туйгун» ыалга Семеновтарга ыалдьыттаатым.