💬Мин 2015 сыллаахтан, баһылык Ю.А.Гуляев ыҥырыытынан баһылык солбуйааччытынан үлэлээби...
💬Мин 2015 сыллаахтан, баһылык Ю.А.Гуляев ыҥырыытынан баһылык солбуйааччытынан үлэлээбитим 10 сыла буолла. Ааспыт сылтан баһылык эбээһинэһин толорбутум. Бар дьонум көҕүлээһининэн баһылыкка туруорунан, дьокутааттар бигэргэтэннэр, дуоһунаспар туруннум. Бөһүөлэккэ, күн бүгүн сурукка 422 киһи киирбититтэн, 245-һэ олохсуйан олорор. Тыыл бэтэрээннэрэ Мотрена Николаевна Слепцова, Варвара Николаевна Бочкарева, Мария Афанасьевна Слепцова чугас дьонунан бигэнэн этэҥҥэ олороллор. ❓Оччотугар нэһилиэги баһылыктаан салайбыккыт биир сыл буолбут эбит, кэнники туох үлэ, сонун хамсааһын ыытылынна? 💬Тупсарыныы (Благоустройство) иитинэн билигин уулуссаларбыт суолларын оҥоробут. 2024 сыллаахха (ППМИ) Олохтоох нэһилиэнньэ көҕүлээһинин өйүүр бырагырааманан ылбыт тыраахтарбыт бары үлэни барытын толорор буолан олохпутугар-дьаһахпытыгар олус көмөлөһөр. Ол курдук баһаартан харыстыыр балаһаны, кыһын сылгы сүөһү аһыыр учаастактарын суолун, уулаах ходуһаларга сиэннэрин оҥордо. Бу бырагырааманан ааспыт сыл Ийэ искибиэрин оҥорбуппут. Быйыл Дьокуускай куоракка «Оҕолоох Ийэ» скульптуратын оҥорторон туруордубут. Бу бырайыакпыт 1 500 000 тэҥнэспитэ. ❓Тыа хаһаайыстыбатын сайдыыта хайдаҕый, кыстыгы хас сүөһүлээх көрүстүгүт? 💬Хороҕор муостааҕы тутар 14 кэтэх хаһаайыстыбалаахпыт. Ынтаах, Баахыл тэрээһиннээх хаһаайыстыбалаахпыт. «Арчы» кэпэрэтииптэн хаалбыт сүөһүлэри тыа хаһаайыстыбатын исписэлииһэ В.Д.Слепцов тутар. Онон кыстыгы 85 ынах сүөһүлээх (30 ыанар ынах), 307 сылгылаах (155 биэ) көрүстүбүт. Сүөһүлэрбит туруктара үчүгэйдэр. Хаһаайыстыбалаах дьон бары бэйэ-бэйэлэригэр олус көмөлөөхтөр. ❓Бу күннэргэ оскуолаҕыт эбийиэгэ саҥардылларын туһунан уураах туттугут. Улахан бырайыагы ситиспиккит. 💬Оскуолабыт 1974 тутуулаах эбийиэк. бырайыак докумуонун, сүрүн тирэҕин Д.С.Слепцов аатынан орто оскуола дириэктэрин э.т. Ф.Ф.Колесов уонна учуутал О.В.Колесова оҥорон ситистилэр. Онон 2028-2029 сыллаахха улахан саҥардыы үлэтигэр хапытаалынай өрөмүөн буолара былааннанна. Саҥа үөрэх сылын 42 үөрэнээччилээх көрүстүбүт. «Ласточка» уһуйааҥҥа 19 оҕо сылдьар. Бу күннээххэ омук тылын учууталыгар аһаҕас вакансия баар. Бу сылтан үөрэхтээһин тэрилтэлэрэ холбоһон «Оскуола-уһуйаан» таһымыгар тэҥнэһэр докумуоннара оҥоһуллар. ❓Балаҕан ыйын 23 күнүгэр нэһилиэккит дьаралыга уонна былааххыт бигэргэммит күнүн бэлиэтээтигит. 💬Өрө дайбыт Куба ойуулаах дьаралыкпыт ытык киһибит В.И.Ефимов- Сыркыс салайыытынан оҥоһуллан 2019 сыллаахха бигэргэммитэ. Бу күн араас тэрээһиннэр ыытылыннылар. Бырааһынньыктар, ханнык да тэрээһин уопсастыба тэрийиитинэн тэриллэллэр. Бөһүөлэкпит «Дьүкээбил», «Саһарҕа», «Сарыал», «Кэскил» түөлбэлэринэн салаллар, сайдар. Арчы дьиэтин бэтэрээннэр Сэбиэттэрин бэрэссэдээтэлэ У.К.Гуляева салайар. Нэһилиэнньэ тэрээһиннэри эрэ буолбакка, үтүө хамсааһыннарга эмиэ көхтөөхтүк кыттар. Анал байыаннай дьайыыга 4 байыаспыт кытта сылдьар. 2023с. олохтоох бүддьүөккэ көрөн хас биирдии байыас дьиэ кэргэнигэр көмө курдук, тутуу матырыйаалын ылынарыгар 50 тыһ. солк аныыбыт. Маны сэргэ АБДь кыттыылааҕар туһунан көмө көрөбүт. Итиэннэ дьиэ кэргэнэ успуорт-култуура тэрээһиннэригэр босхо сылдьаллар. Кэлэр сылтан дьиэ туттар, тупсарынар баҕалаах дьоҥҥо тутуу малын аҕалар«Своя усадьба» бырагыраамабытын сөргүтэр баҕа санаалаахпыт. «Хаҥалас кэскилэ» НКО тэрилтэ, уопсастыбаннай бэйэни салайынар түмсүүбүт (ТОС) Граҥҥа киирсэргэ сайаапка ыыттылар. ППМИ иитинэн алтынньы ыйга нэһилиэнньэ куоластааһынынан кэлэр сыллааҕы бырайыакпыт быһаарыллыаҕа. Былаан, баҕа санаа элбэх. Сүрүн соругунан балыыһа уонна олохтоох ДЭС эбийиэктэрин тутуу буолар. Кэлэр сыл олохтоох Сэбиэт тэриллибитэ 100 сылын бэлиэтиэхпит. 🌞Саҥа баһылыктанан, саҥа тыыннаммыт нэһилиэккэ үүнүүнү-сайдыыны баҕарабыт. Эбээхтэр урут уруккуттан баай, сайдыылаах, сатабыллаах салайааччылаах, элбэх урбаанньыттаах, олус кыраһыабай көстүүлээх, аныгы олоҕу кытта тэҥҥэ хаамсар бөһүөлэгинэн буолар. Саҥа салалта олох тиэмпэтин тутан, салҕыы тупсаран, сайыннаран иһэригэр баҕарабыт. Тыа сиригэр, олох өрүү баар буоллун! Саргылана Кокорина