Хангаласский улусный краеведческий музей им. Г. В. Ксенофонтова
Без категории · 31 марта 2026 г.
Дьаамсыктар астарыттан… — 31 марта 2026 г. в 08:51:26.835
Дьаамсыктар астарыттан… Бу быыстапка арыллыытыгар улууспут баһылыга Сергей Гребнев махтал, эҕэрдэ тылларын эттэ, фестиваль ситиһиилээхтик ааһарыгар, үлэ салгыы барарыгар баҕа санаатын тириэртэ. Фольклорнай кэлэктииптэртэн дьаам дьоно тугу аһаан-сиэн олорбуттарыгар киһи интэриэһиргиирэ үгүс. Бүлүүдэлэргэ күрэххэ Мохсоҕоллоох “Бубенцы над Леной” ырыаһыттара «Паасха остуолун” тардан былааһы ыллылар. Киэргэтиилэрэ да сонун, чүмэчилэри уматан, сибэтиэй бырааһынньыктарын остуолларыгар киэргэтиигэ быычыкайкаан чуучала оҕолорун фигуркаларын ас арааһа баарын көрдөрөр бүлүүдэлэрин быыһыгар кыбытан фантазиялара киэҥин итэҕэттилэр. Бу кэлэктииптэн үйэ аҥарыттан ордук эргиэҥҥэ, общественнай аһылык тэрилтэлэригэр үлэлээбит Сиинэттэн кэлэн олохсуйбут Зоя Перфильева перловкалаах хоҥор хааһа тэҥнээҕин буолбата, “Көтөр этиттэн бастыҥ ас» анал ааты ылла. Ону сэргэ балыктан кэтилиэттээх Оксана Гусева минньигэс бөрүөгэ бэлиэтэтэннэ. Иккискэ «Сударушка” асчыттара күннээтилэр – Елена Сергеева хортуоппуйдаах сааҥкыта тута амсайыллан бүттэ, Татьяна Ходжава балыктан аһа аатырда. Үһүскэ Үөдэй “Вечорката» тигистэ, Надежда Герасимова сүбүөкүлэттэн кыбааһа утахтарга кыайда. Уопсайынан, хас биирдии ансаамбыл туох эрэ ураты астаах буолла – Уулаах Аан «Долинушката” сордоҥунан, Валентина Ноева туспа рецебинэн буһарбыт редькатынан, Сиинэ “Реченьката” – доруоһата суох астаммыт бэрэскитинэн (сиинэлэр өссө остуолларын ырыанан билиһиннэрдилэр), сыбаайбаҕа анаан таҥаска сууламмыт киэргэтиилээх Лариса Слепцова буһаран уурбут куһунан – дьаамнар бэлиэ түгэннэригэр ураты суолталаах аһы бэлэмнииллэрин иһитиннэрдилэр. Ас хотойорунан буолла. Дьокуускайтан ыалдьыттарбыт остуола эмиэ дэлэй аһын көрдөрдө. Сорохторго аһыы утах арааһа да баар буолла. Ол эрэн дьаам дьоно үлэни, сынньалаҥы да кыайаллар, итирэн-кутуран буккуллубут кинилэргэ суох буолааччы. Дьаам остуолун көрүү, үгэстэрин билсии барыбытыгар ураты түгэннэри бэлэхтээтэ. Хаҥалас хаһыат матырыйаалыттан.