✒ Музей колнакт суссылтап вāрвес — 29 июня 2026 г. в 09:22:50.002
✒ Музей колнакт суссылтап вāрвес Лӯпта э̄тпос онтоловит хо̄талэ̄т Ханты-Мансийск ӯст «То̄рум Маа» музей колнакт Татьяна Александровна Молданова мāньлат порат вāрум пормасанэ хосыт суссылтап вāрвес. Ты ханты э̄ква ань 75 тāлэ то̄влыс. Тав пе̄с йис вāрмалит щирыл учёный хо̄тпаг о̄лы. Сāв тāл Югорский университетыт ня̄врамыт ханищтым рӯпиты. Ань ты суссылтап кāсалаӈкве ос таве намхо̄талэ̄тыл янытлаӈкве сāв мāхум ёхталасыт. 1987 тāлт, хунь «То̄рум Маа» музей ущты вāруӈкве патвес, Татьяна Александровна тот рӯпитас. Та порат ты музей Творчество кол нупыл хансым о̄лыс. То̄нт мāньлат нэ̄ округув янытыл сосса мāхум о̄лнэ мāнь пāвлытын ялантас. Ты вāрмаль ювле хультум нотыт нёлсāт ос онтырсāт тāлытт о̄лыс. Тав сосса мир юн о̄щнэ пе̄с пормасыт акван-атыс ос музей колн тотсанэ. Нэ̄ сосса маснутыт ос хорамыӈ хансат по̄слыс ос хумус сосса мāхум о̄лэ̄гыт, ты урыл потрыт хансыс. Ань музей колнакт ты рӯпататэ урыл суссылтап щё̄питавес. Музей кӯщай нэ̄ Елена Федотова лāвыс: – Пӯмащипа нāнан ты суссылтапын ёхтумын мāгыс. Мāн кāсыӈ хо̄тпа щāгтым ӯрилӯв. Музеюв вāрим порат Татьяна Александровна сāв нё̄тмил вāрыс. Ань тав нёлсāт нупыл ат тāлэ то̄влын кастыл мāн ты суссылтап щё̄питаслӯв. Мāньлат āгит-пыгыт, хотьютыт этнографыг ханищтахтэ̄гыт манос ущты ты вāрмаль хосыт рӯпитаӈкве о̄вылтахтасыт, ты рӯпата вāрнэ урыл тыт тāра-паттуӈкве ве̄рме̄гыт. Материал на сайте https://khanty-yasang.ru/luima-seripos/no-12-1366/22778 #ХантыМансиМир #ЛуимаСэрипос #статьиОРНГ #ТекстНаМансийском