👩🏻🏫📖📝 56 сыл оҕо иитиитигэр
👩🏻🏫📖📝 56 сыл оҕо иитиитигэр Бүгүн Учуутал күнэ, киһи-аймах сүгүрүйэр дьонун үлэлэрин өрө тутар, кинилэргэ махтанар дьоһун күн. Биһиги оройуоммутугар 56 сыл оҕо иитиитигэр олоҕун анаабыт, билигин да Муома алын сүһүөх оскуолатыгар айымньылаахтык үлэлии сылдьар Саха Республикатын үөрэҕириитин туйгуна уонна бочуоттаах ветерана, "Гражданскай килбиэн" бэлиэ хаһаайына, Муома оройуонун бочуоттаах олохтооҕо Антонина Яковлевна Слепцованы биһиги бары билэбит, убаастыыбыт. Бүгүн кини биһиги ыалдьыппыт буолар. - Антонина Яковлевна, Учуутал күнүнэн истиҥник эҕэрдэлээн туран эн учууталлаабыт кэмнэргин ахтан-санаан ылыах эрэ. - Мин Бүлүү педагогическай училищетын бүтэрэн 1970 сыллаахха Муома оройуонугар ананан кэлбитим. Педагогическай үлэбин Орто Дойду алын сүһүөх оскуолатыттан саҕалаабытым. Онтон Индигир аҕыс кылаастаах оскуолатыгар учууталлаабытым. 1981 сыллаахха Хонууга көһөн киирэн икки сыл интернат иитээччитинэн, 1983 сылтан Муома алын сүһүөх оскуолатыгар ИЗО, труд учууталынан үлэбин саҕалаабытым . Онтон ыла күн бүгүнүгэр диэри үлэлии сылдьабын. Билигин бу оскуолабар төрөппүт албан аатын музейын үлэлэтэбин. - Үчүгэй учуутал буоларга киһиэхэ туох хаачыстыба баар буолуохтааҕый? - Алын сүһүөх кылаас учуутала үөрэтэр оҕолоругар иккис ийэ, аҕа курдук буолар. Саҥа оскуола боруогун атыллаан киирбит оҕону кытта үлэлииргэ, үөрэтэргэ улахан эппиэтинэс, ирдэбил учууталга сүктэриллэр . Оҕо барыта биир буолбат. Хас биирдии оҕоҕо тус туспа иитэр үөрэтэр ньыма наада. Ону эрэ таба тайаннаххына бүтүн кылааһы тутаҕын. Оччоҕо эрэ үлэҥ таһаарыылаах буолар дии саныыбын. - Уопуттаах учуутал бэлиэтии көрөрүҥ буолуо урукку уонна билиҥҥи кэмнэр оҕолорун уратыларын. - Бу кэлиҥҥи кэмҥэ оҕолорбут бары нууччалыы саҥара сылдьаллара киһини дьиксиннэрэр. Маннык буоллаҕына ийэ тылбыт сүтэн симэлийэр кутталлаах. Онон төрөппүттэр оҕолорун кытта дьиэ иһигэр сахалыы кэпсэтэллэрэ наада дии саныыбын. Оччоҕуна эрэ оҕо төрөөбүт тылын билиэҕэ. Оччоҕуна эрэ сахабыт тыла симэлийэ сүтүө суоҕа. - Биир идэлээхтэргэр баҕа санааларыҥ? - Бииргэ үлэлиир коллегаларбар үлэлэригэр үрдүк ситиһиилэри, тус олохторугар дьолу, или-эйэни баҕарабын, үөрэтэр оҕолоро сырдыкка, кэрэҕэ тардыһар үтүө дьон буоллуннар. Учууталларын аатын куруук үрдүктүк туттуннар. ✍🏻 Светлана Кривошапкина @indigir_uottara